జాన్వీ లిస్టులో మరో టాలీవుడ్ హీరో.. ఓ క్లారిటీ వచ్చేసింది

బాలీవుడ్ బ్యూటీ, అతిలోక సుందరి శ్రీదేవి కూతురు జాన్వీ కపూర్ దేవర చిత్రంతో టాలీవుడ్ లోకి గ్రాండ్ ఎంట్రీ ఇస్తోంది. సెప్టెంబర్ 27న ఈ సినిమా భారీ అంచనాల మధ్యలో రిలీజ్ కాబోతోంది. ఇప్పటికే ఈ చిత్రంలో ఎన్టీఆర్, జాన్వీ కపూర్ మీద చిత్రీకరించిన చుట్టమల్లే సాంగ్ రిలీజ్ అయ్యి సూపర్ హిట్ టాక్ సొంతం చేసుకుంది. ఈ సాంగ్ లో జాన్వీ కపూర్ చాలా అందంతో కనిపించింది. గ్లామర్ షోతో అందరిని కట్టిపడేసింది.

పెద్దగా డాన్స్ మూమెంట్స్ లేకపోయిన కూడా జాన్వీ కపూర్ సౌందర్యానికి తెలుగు ప్రేక్షకులు అయితే ఫిదా అయిపోయారు. ఈ సాంగ్ ప్రస్తుతం యుట్యూబ్ లో ట్రెండింగ్ లో ఉంది. దీని తర్వాత గ్లోబల్ స్టార్ రామ్ చరణ్ కి జోడీగా RC16 చిత్రంలో జాన్వీ కపూర్ కన్ఫర్మ్ అయ్యింది. ఇప్పటికే ఈ మూవీ లాంచింగ్ ఈవెంట్ లో కూడా జాన్వీ కపూర్ పాల్గొంది. బుచ్చిబాబు సానా దర్శకత్వంలో తెరకెక్కబోయే ఈ సినిమా కూడా పాన్ ఇండియా ప్రాజెక్ట్ కావడం విశేషం.

తెలుగులో బ్యాక్ టూ బ్యాక్ స్టార్ హీరోలతో జతకట్టే ఛాన్స్ ని జాన్వీ కపూర్ సొంతం చేసుకుంది. ఇదిలా ఉంటే నాచురల్ స్టార్ నానికి జోడీగా జాన్వీ కపూర్ నటించబోతోందనే ప్రచారం కొంతకాలంగా నడుస్తోంది. దసరా లాంటి సక్సెస్ ఇచ్చిన శ్రీకాంత్ ఓదేల దర్శకత్వంలో నాని మరో సినిమా చేయడానికి గ్రీన్ సిగ్నల్ ఇచ్చారు. ఈ మూవీ కోసం జాన్వీ కపూర్ ని సంప్రదించారనే మాట వినిపిస్తోంది. తాజాగా సరిపోదా శనివారం మూవీ ప్రమోషన్స్ లో నానిని ఇదే ప్రశ్న మీడియా ప్రతినిధులు అడిగారు.

శ్రీకాంత్ ఓదేల దర్శకత్వంలో మూవీ స్క్రిప్ట్ వర్క్ ఇంకా కంప్లీట్ కాలేదని నాని ఈ మీడియా మీట్ లో క్లారిటీ ఇచ్చారు. అలాగే 2025 ప్రథమార్ధంలో ఈ సినిమా స్టార్ట్ అవుతుందని తెలిపారు. ఆ చిత్రం కోసం ఇంకా ఎలాంటి క్యాస్టింగ్ సెలక్షన్ జరగలేదని స్పష్టం చేశారు. తన దృష్టికి కూడా ఈ విషయం రాలేదని నాని సమాధానం చెప్పారు. ఈ క్లారిటీతో నానికి జోడీగా జాన్వీ కపూర్ నటిస్తుందనే ప్రచారం కేవలం గాసిప్ అని కన్ఫర్మ్ అయిపొయింది.

సరిపోదా శనివారం సినిమా రిలీజ్ తర్వాత నాని తన సొంత ప్రొడక్షన్ లో శైలేష్ కొలను దర్శకత్వంలో హిట్ 3 చేసే అవకాశం ఉందంట. ఇప్పటికే ఈ మూవీ స్క్రిప్ట్ వర్క్ ప్రస్తుతం జరుగుతోందని తెలుస్తోంది. దీని తర్వాత శ్రీకాంత్ ఓదేల సినిమాని స్టార్ట్ చేస్తారని టాక్. నెక్స్ట్ సుజిత్ దర్శకత్వంలో పాన్ ఇండియా మూవీని నాని చేయనున్నారు.