'ఎమ్మెల్యేలకు మసాజ్ కుర్చీలు.. భోజనం తర్వాత విశ్రాంతి సోఫాలు..' తప్పేంటన్న స్పీకర్

కర్ణాటక అసెంబ్లీ స్పీకర్ యూటీ ఖాదర్ ఎమ్మెల్యేల సౌకర్యాలను మెరుగుపరిచేందుకు ప్రతిపాదించిన సూచనలు ఇప్పుడు చర్చనీయాంశంగా మారాయి. ఆయన ప్రతిపాదనల ప్రకారం, ప్రతి ఎమ్మెల్యే కార్యాలయానికి స్మార్ట్ లాక్‌లను ఏర్పాటు చేయడంపై రూ. 3 కోట్ల వ్యయం అవుతుందని అంచనా. అంతేకాదు, అసెంబ్లీలో మధ్యాహ్న భోజనం అనంతరం విశ్రాంతి కోసం రిక్లైనర్లు, మసాజ్ కుర్చీలు ఏర్పాటు చేయాలని ఆయన సూచించారు.

ఈ ప్రతిపాదనలు ప్రాథమిక స్థాయిలో ఉన్నాయని, అవసరమైన ఇతర సౌకర్యాలపై శాసనసభ్యులతో ఇంకా చర్చలు జరుగుతాయని స్పీకర్ ఖాదర్ తెలిపారు. గతంలో రిక్లైనర్ల ఏర్పాటును సమర్థించిన ఆయన, ఇప్పుడు మసాజ్ కుర్చీల అంశాన్ని సమర్ధిస్తూ, శాసనసభ సభ్యులు గంటల కొద్దీ చర్చలు నిర్వహిస్తుండటంతో ఒత్తిడిని తట్టుకునేందుకు వీటిని ఏర్పాటు చేస్తున్నామని వివరించారు. ఇది విలాస విరుద్ధమైన నిర్ణయం కాదని స్పష్టం చేశారు.

అనేక మంది ఎమ్మెల్యేలు పెద్దవారు, సీనియర్ సిటిజన్లు కాబట్టి, వారికీ విశ్రాంతి కోసం తగిన ఏర్పాట్లు చేయడం అవసరమని ఖాదర్ పేర్కొన్నారు. వీటిని కొనుగోలు చేయడం కాకుండా, అద్దెకు తీసుకుంటామని తెలిపారు. ఎమ్మెల్యేలను శత్రువుల్లా కాకుండా, స్నేహితుల్లా చూడాలని ప్రజలకు విజ్ఞప్తి చేశారు. "మీ తండ్రి లేదా సోదరుడు ఎమ్మెల్యే అయితే, వారి కోసం విశ్రాంతి ఏర్పాట్లు చేయరా?" అంటూ ఆయన ప్రశ్నించారు.

స్పీకర్ వ్యాఖ్యలను గ్రామీణాభివృద్ధి, పంచాయతీ రాజ్ మంత్రి ప్రియాంక్ ఖర్గే సహా మరికొందరు మంత్రులు సమర్థించారు. "రిక్లైనర్లు, మసాజ్ కుర్చీల గురించి నాకు తెలియదు. అయితే, శాసనసభ్యులు సమావేశాలకు హాజరు కావడానికి, చురుకుగా పాల్గొనేలా స్పీకర్ విశేషంగా ప్రయత్నిస్తున్నారు" అని ఖర్గే వ్యాఖ్యానించారు. అటవీ శాఖ మంత్రి ఈశ్వర్ ఖండ్రే కూడా స్పీకర్‌కు మద్దతుగా, "అసెంబ్లీలో అనేక మంది సీనియర్ సభ్యులు ఉన్నారు. స్పీకర్ నిర్ణయం ఎమ్మెల్యేల హాజరును మెరుగుపరిచేలా ఉంటుంది. అందులో తప్పేం లేదు" అని అన్నారు.

మరోవైపు, బీజేపీ ప్రతిదానినీ రాజకీయంగా మార్చేందుకు ప్రయత్నిస్తోందని ఆయన ఆరోపించారు. అసలు వారి విమర్శలకే వారు సిగ్గుపడాలని ఖండ్రే ఎద్దేవా చేశారు.