వాళ్లలో మగాళ్లు లేరంటున్న కేటీఆర్!

ఎన్నికల ప్రచారంలో కేటీఆర్ దూకుడు కొనసాగిస్తున్నారు. ప్రచార కార్యక్రమాల్లో తనదైన ట్రెండు కొనసాగిస్తూ ఓటర్లను ఆకర్షించేందుకు ప్రయత్నిస్తున్నారు. కాంగ్రెస్, బీజేపీపై తీవ్రస్థాయిలో విమర్శలు చేస్తూ సాగిపోతున్నారు. తాజాగా బీజేపీ నాయకులను ఉద్దేశించి కేటీఆర్ చేసిన వ్యాఖ్యలు హాట్ టాపిక్ గా మారాయి. ఆ పార్టీలో మగాళ్లే లేరనే అర్థం వచ్చేలా కేటీఆర్ మాట్లాడారు. బీజేపీలో ఎన్నికల్లో నిలబడే సత్తా లేక కిషన్ రెడ్డి పత్తా లేకుండా పోయారని కేటీఆర్ విమర్శించారు.

అంతే కాకుండా ఓ చిన్న కథ కూడా చెప్పారు. "పొట్టకూటి కోసం కష్టం చేసుకునే బతికే భార్యభర్తలు చెట్టు కింద కూర్చుని భోజనం చేస్తుంటే పై నుంచి తేలు పడింది. అది చూసిన భార్య తేలు అని అరిచింది. అది విన్న భర్త తేలును చంపకుడా అక్కడి నుంచి పరుగెత్తాడు. ఎక్కడికి వెళ్తున్నారని భార్య అడగితే.. తేలును చంపేందుకు ఎవరైనా మగవాళ్లు ఉంటే తీసుకొస్తానని చెప్పాడు. ఇప్పుడు బీజేపీ వాళ్ల పరిస్థితి కూడా అలాగే ఉంది" అని కేటీఆర్ పేర్కొన్నాడు.

తెలంగాణ ఎన్నికల రేసులో ఇప్పటికే బీజేపీ వెనుకబడిందనే అభిప్రాయాలు వ్యక్తమవుతున్నాయి. మరోవైపు బీజేపీ తెలంగాణ అధ్యక్షుడు కిషన్ రెడ్డి ఈ సారి పోటీకి దూరంగా ఉన్నారు. అధిష్ఠానం నిర్ణయం మేరకే కిషన్ రెడ్డి ఎన్నికల్లో పోటీ చేయడం లేదని పార్టీ చెబుతోంది. కానీ కేసీఆర్ కు భయపడే కిషన్ రెడ్డి పారిపోయారని అధికార బీఆర్ఎస్ విమర్శిస్తోంది.