ఇది ట్రైల‌ర్ మాత్ర‌మే.. చండీగఢ్ గురుగ్రామ్ పేలుళ్ల‌పై బిష్ణోయ్ గ్యాంగ్

బాలీవుడ్ సూప‌ర్ స్టార్ స‌ల్మాన్ ఖాన్ ని చంపేస్తామంటూ బెదిరించిన గ్యాంగ్ స్ట‌ర్ లారెన్స్ బిష్ణోయ్ ప్ర‌స్తుతం జైలులో ఊచ‌లు లెక్కిస్తున్న సంగ‌తి తెలిసిందే. జైలు వెలుప‌ల అత‌డి అనుచ‌రులు భీభ‌త్సం సృష్టిస్తున్నారు. అతడి కోసం దాదాపు 700 మంది షూట‌ర్లు ప‌లు ప్రాంతాల నుంచి ప‌ని చేస్తున్నారు. విదేశాల నుంచి భార‌త‌దేశంలో గ్యాంగ్ ఆప‌రేష‌న్స్ నిర్వ‌హిస్తున్న‌ లారెన్స్ బిష్ణోయ్ సోద‌రుడైన అన్మోల్ బిష్ణోయ్ ని అరెస్ట్ చేసేందుకు భార‌తీయ పోలీసులు శ‌తవిధాలా ప్ర‌య‌త్నిస్తున్నా ఏదీ స‌ఫ‌లం కావ‌డం లేదు. ఇంత‌లోనే ఇటీవ‌ల‌ చండీగ‌ఢ్‌, గురుగ్రామ్ పేలుళ్లు సంచ‌ల‌నం సృష్టించాయి.

తాజా ప్ర‌క‌ట‌న‌లో చండీగఢ్, గురుగ్రామ్ బాంబు పేలుళ్లకు బాధ్యత వహిస్తున్నట్లు బిష్ణోయ్ గ్యాంగ్ కు చెందిన‌ గ్యాంగ్‌స్టర్ రోహిత్ గోదారా వెల్ల‌డించాడు. గోల్డీ బ్రార్ -లారెన్స్ బిష్ణోయ్ గ్యాంగ్‌కు సన్నిహితుడైన యాక్టివ్ గ్యాంగ్‌స్టర్ రోహిత్ గోదారా మంగళవారం ఉదయం గురుగ్రామ్ సెక్టార్ 29 క్లబ్ వెలుపల జరిగిన బాంబు పేలుడుకు బాధ్యత వహించాడు. ఇరు న‌గ‌రాల్లో జరిగిన బాంబు పేలుళ్లు కేవలం ట్రైలర్ మాత్రమే అని గోదారా ఫేస్‌బుక్‌లో ఒక పోస్ట్‌లో రాశారు.

''అందరికీ రామ్-రామ్ జై శ్రీరామ్... నేను, రోహిత్ గోదారా, బికనీర్, గోల్డీ బ్రార్.... చండీగఢ్‌లోని రెండు క్లబ్‌ల వెలుపల .. రెండు రోజుల క్రితం గురుగ్రామ్ సెక్టార్ 29లో బాంబు పేలుళ్లకు కారణమయ్యాం. జూదం బుకీలు, హవాలా వ్యాపారులు .. డ్యాన్స్ క్లబ్‌లు.. రోజూ కోట్లాది రూపాయలు సంపాదిస్తున్న వారంతా పన్ను చెల్లించాల్సిందే. ఇది మీ చెవులు తెరవడానికి కేవలం ఒక చిన్న డెమో. అటువంటి డ్యాన్స్ క్లబ్‌లను విచ్ఛిన్నం చేసే మరింత పెద్ద పేలుడును మేం సృష్టించవచ్చు. దీన్ని మా హెచ్చరికగా తీసుకోకండి.. మేం చెప్పినట్టే చేస్తాము. పేదల రక్తాన్ని పీల్చే వారు, దేశ పన్నులను ఎగవేసి కోట్లాది రూపాయలు ఆర్జించే వారు అందరూ చెల్లించాల్సిందే'' అని పోస్ట్ చేసారు.

ప్ర‌స్తుతం గురుగ్రామ్ పోలీసులు పేలుడు సమయంలో అరెస్టు చేసిన నిందితుడు సచిన్ తలియాన్‌ను విచారిస్తున్నారు. పేలుడులో పాల్గొన్న మరికొందరి గురించి సమాచారం సేకరిస్తున్నారు. విచారణలో సచిన్ నుంచి చాలా సమాచారం రాబట్టినట్లు సీనియర్ అధికారి ఒకరు తెలిపారు. ఈ కేసులో మరికొంత మంది ప్రమేయం కూడా వెలుగులోకి రాగా త్వరలోనే వారిని పట్టుకుంటామన్నారు.

మ‌ద్యం మత్తులో నిందితుడు:

గురుగ్రామ్‌లో ఘటన జరిగిన సమయంలో అనుమానాస్ప‌ద వ్య‌క్తి సచిన్ మద్యం మత్తులో ఉన్నట్లు ప్రాథమిక విచారణలో తేలింది. నిందితుడు మత్తులో ఉన్నాడు. అతడు అప్పటికే రెండు కాటన్ బాంబులు విసిరాడు. మరో రెండు విసిరేందుకు సిద్ధంగా ఉన్నాడు.. పోలీసులు జోక్యం చేసుకుని బాంబులతో పాటు అతన్ని అరెస్టు చేశారని గురుగ్రామ్ పోలీసులు తెలిపారు. గురుగ్రామ్ పోలీసు కమిషనర్ వికాస్ అరోరా సంఘటనా స్థలాన్ని స్వయంగా పరిశీలించారు. అతని సూచనల మేరకు గురుగ్రామ్ పోలీసు బాంబు నిర్వీర్య బృందాన్ని ఆ ప్రాంతంలో తనిఖీ చేసి భద్రత కల్పించడానికి పిలిచారు. నిందితుడి వద్ద నుంచి స్వాధీనం చేసుకున్న రెండు లైవ్ కాటన్ బాంబులను బాంబు నిర్వీర్య బృందం నిర్వీర్యం చేసిందని పోలీసులు తెలిపారు. ఈ ఘటనలో స్పాట్ లో ఉన్న ఒక‌ స్కూటీకి, బోర్డుకు స్వల్ప నష్టం వాటిల్లింది. ఎలాంటి ప్రాణనష్టం లేదా గాయాలు సంభవించలేదు.