హాలీవుడ్ హంతకుడి గెటప్ లో మార్క్ జుకర్ బర్గ్... ఏమిటీ "హాలోవిన్" సందడి?

ఎంతటి బిజీ పర్సన్స్ అయినా.. ప్రతీ ఏటా కొన్ని రోజులు హాలిడేస్ కోసం కచ్చితంగా కేటాయించాలని.. ఎవరి స్థాయిలో వాళ్లు వాళ్ల వాళ్ల ఫ్యామిలీ, ఫ్రెండ్స్ తో ఇతర ప్రాంతాల్లో సమయాన్ని గడిపి, కొత్త వాతావరణాన్ని ఆస్వాధించాలని చెబుతుంటారు. ఈ సమయంలో... తాజాగా మార్క్ జుకర్ బర్గ్ అదే చేశారు.

అవును... ప్రపంచ కుబేరుల్లో ఒకరు, మెటా అధినేత అయిన మార్క్ జుకర్ బర్గ్ తాజాగా కొత్త అవతారంలో కనిపించారు. తన భార్య, ముగ్గురు కుమార్తెలతో కలిసి "హాలోవీన్" లో సందడి చేశారు. ఈ సందర్భంగా ఫ్యామీతో పాటు సరికొత్త గెటప్ లో కనిపించారు. ఈ పిక్స్ ఇప్పుడు నెట్టింట హల్ చల్ చేస్తున్నాయి.

ఈ ఫోటోల్లో జుకర్ బర్గ్ ఫ్యామిలీ మొత్తం సరికొత్త గెటప్స్ లో కనిపించారు. ఇందులో భాగంగా... "జాన్ విక్" మూవీలోని హంతకుడి పాత్రను మార్క్ జుకర్ బర్గ్ వేయగా.. భార్య కుమార్తెలు బాలెరినా దుస్తుల్లో మెరిశారు. ఈ ఫోటోలకు నెట్టింట కామెంట్ల వర్షం కురుస్తోంది. ఈ ఫోటోలకు లైక్ లు కొడుతూ మార్క్ జుకర్ బర్గ్ ని ఎంకరేజ్ చేస్తున్నారు నెటిజన్లు.

ఏమిటీ "హాలోవీన్" వేడుక?

ఏటా అక్టోబర్ 31న "హాలోవీన్" వేడుకలు జరుగుతుంటాయి. ప్రపంచంలో జరిగే అనేక వేడుకలకు భిన్నంగా ఇవి ఉంటాయి. వీటిలో పాల్గొనే వారు దెయ్యాలు, రాక్షసుల దుస్తులు ధరించి ఇతరులను భయపెట్టే ప్రయత్నం చేస్తుంటారు. ఇరుగుపొరుగు అంతా కలిసి రాత్రిపూట విందు వినోదాలతో వేడుక నిర్వహించుకుంటారు.

వాస్తవానికి క్రీస్తు పూర్వమే యూకే, ఉత్తర ఫ్రాన్స్, ఐర్లాండ్ లో ఉన్న సెల్ట్స్ అనే తెగ ప్రజలు ఈ వేడుకలను జరుపుకునేవారని చెబుతారు. అప్పట్లో దీన్ని " సమ్ హైయిన్" అని పిలిచేవారట. ఆ తెగ ప్రజలకు నవంబర్ 1న నూతన సంవత్సరం మొదలయ్యేది.. దీంతో ఇప్పుడు డిసెంబర్ 31 నైట్ లాగా.. వారికి అక్టోబర్ 31 నైట్ సందడి జరిగేదన్నమాట!