విమానంలో దోమలపై దండయాత్ర... వీడియో వైరల్!

గతంలో ఒకసారి ఢాకా నుంచి కోల్‌ కతా వెళ్తున్న ఇండిగో విమానంలో దోమలు దాడి చేశాయి. దీంతో ప్రయాణికులంతా తీవ్ర సౌకర్యానికి గురవ్వగా... బ్యాట్ లు చేతపట్టిన ఎయిర్ హోస్టేస్ ఆ దోమలపై విమానంలో యుద్ధం ప్రకటించి తీవ్రంగా శ్రమించారు. అప్పట్లో ఆ వీడియో వైరల్ గా మారింది. ఇలాంటి ఘటనలు పునరావృతం అవ్వకుండా చూసుకుంటామని సంస్థ తెలిపింది. ఈ సమయంలో తాజాగా అంతకు మించి అన్నట్లుగా దోమలు విమానాన్ని ఆపేశాయి.

అవును.. ప్రకృతి, అందులోని ప్రతీ ప్రాణీ సహకరిస్తే తప్ప, వాటన్నింటినీ శాసిస్తున్నట్లు ఫీలవుతున్న మనిషి మనుగడ అంత ఈజీ కాదు! అది చీమైనా, దోమైనా, కంటికి కనిపించని అతిసూక్ష్మ జీవి అయినా! ఈ క్రమంలో ఒక దోమల గుంపు ఒక విమానాన్ని ఆపేసింది. వీటి వల్ల ఆ విమాన ప్రయాణం సుమారు మూడు గంటలు ఆలస్యం అయ్యింది.

వివరాళ్లోకి వెళ్తే... గ్వాడలజారా అనే ప్రాంతం నుంచి మెక్సికో వెళ్లే విమానంలో అక్టోబర్ 6న ఈ ఘటన చోటు చేసుకుంది. కాస్త ఆలస్యంగా వెలుగులోకి వచ్చినప్పటికీ దీనికి సంబంధించిన వీడియో ఇప్పుడు వైరల్ అవుతుంది. ఇందులో భాగంగా.. మెక్సికోకు వెళ్లాల్సిన విమానం గ్వాడలజారా ఎయిర్‌ పోర్టులో సిద్ధంగా ఉంది. ప్రయాణికులంతా వారి వారి సీట్లలో కూర్చున్నారు. ఈ క్రమంలో విమానంలో ఒకటే సందడి.

ఎవరికి వారు చేతిలో ఉన్న పేర్పర్లూ, పుస్తకాలు తీసుకుని యుద్ధం చేస్తున్నారు.. తీరా చూస్తే... క్షణాల్లో విమానం నిండా దోమలు వచ్చేశాయి. ఈ ఊహించని పరిణామంతో అవాక్కైన విమాన సిబ్బంది... స్ప్రేలు తీసుకుని కొట్టడం మొదలుపెట్టారు. ఎంతలా అంటే... విమానం మొత్తం శీతాకాలం ఉదయం పొగమంచు కప్పుకున్నంతలా! ఉన్నట్టుండి చోటు చేసుకున్న ఈ ఘటనతో ప్రయాణికులంతా ఒక్కసారిగా ఉలిక్కిపడ్డారు.

దీంతో ఈ విమానం చాలా అలస్యంగా బయలుదేరాల్సి వచ్చింది. అవును... ఉదయం 4:30 గంటలకు బయలు దేరాల్సిన ఈ విమానం.. గుంపుగా వచ్చిన దోమల పుణ్యమాని సుమారు మూడు గంటలు ఆలస్యమయ్యిందంట.

కాగా... ఈ విమానాశ్రయం పక్కనే పెద్ద మురుగు నీటి కుంట ఉందంట. పైగా.. ఇటీవల కురిసిన వర్షాలకు వరద నీరంతా ఆ కుంటలోకి వచ్చి చేరిందట. దీంతో చుట్టు పక్కల ప్రాంతాల్లో దోమల బెడద పెరిగిపోయిందట. ఈ దోమల గుంపు అక్కడి నుంచే వచ్చినట్లు అధికారులు చెబుతున్నారు.

ప్రస్తుతం ఈ వీడియో సోషల్ మీడియాలో తెగ వైరల్ అవుతోంది. దీనిపై నెటిజన్లు ఫన్నీ ఫన్నీ కామెంట్లు చేస్తున్నారు. విమానంలో దోమలపై దండయాత్ర అని సెటైర్స్ వేస్తున్నారు. దోమే కదా చిన్న చూపు చూస్తే విమానాన్నైనా ఆపేస్తాం అని కామెంట్లు పెడుతున్నారు.