"చంద్రబాబుచల్లగా ఉండాలి".. వైరల్ గా మోహన్ బాబు "విజ్ఞప్తి"!

తిరుమల శ్రీవారి లడ్డూ ప్రసాదంలో కల్తీ జరిగిందన్న ఆరోపణలు ఇప్పుడు దేశవ్యాప్తంగా తీవ్ర చర్చనీయాంశం అవుతున్న సంగతి తెలిసిందే. ఈ వ్యవహారంపై రాజకీయ నాయకులతో పాటు పలువురు సినీ ప్రముఖులూ వారి వారి స్పందనను తెలియజేస్తున్నారు. ఈ సమయంలో నటుడు, నిర్మాత, పద్మశ్రీ మంచు మోహన్ బాబు స్పందించారు. ఈ సందర్భంగా ఎక్స్ లో ఓ విజ్ఞప్తి చేశారు!

అవును.. ఇప్పుడు దేశవ్యాప్తంగా తిరుమల లడ్డూ ప్రసాదంలో కల్తీ నెయ్యి, జంతువుల కొవ్వు వాడారనే ఆరోపణలు తీవ్ర చర్చనీయాంశంగా మారుతున్న సంగతి తెలిసిందే. ఈ నేపథ్యంలో ఈ విషయంపై ఇప్పటికే ప్రకాశ్ రాజ్ - మంచి విష్ణు మధ్య ఎక్స్ వేదికగా స్పందనల షేరింగ్ జరిగిన సంగతి తెలిసిందే. ఈ సమయంలో మోహన్ బాబు స్పందించారు. ఎక్స్ వేదికగా కీలక వ్యాఖ్యలు చేశారు.

ఇందులో భాగంగా.. "ప్రపంచ వ్యాప్తంగా ప్రతీ హిందూ పూజించే కలియుగ దైవం శ్రీ వెంకటేశ్వర స్వామి" అని మొదలుపెట్టిన మోహన్ బాబు... ఆ దైవానికి నిత్యం సమర్పించే లడ్డూలో కలిపే ఆవు నెయ్యిలో మూడు నెలల క్రితం వరకూ జంతువుల కొవ్వుని కలుపుతున్నారని తెలియగానే ఓ భక్తుడిగా తల్లడిల్లిపోయినట్లు తెలిపారు. ఈ సందర్భంగా తీవ్ర దిగ్భ్రాంతికి గురైనట్లు వెల్లడించారు.

ఇక నిత్యం "మోహన్ బాబు యూనివర్శిటీ" నుంచి కనిపించే తిరుమల క్షేత్రాన్ని చూసి తనతో పాటు వేలాదిమంది ఉపాధ్యాయులు, విద్యార్థినీ విద్యార్థులు, నిత్యం భక్తిపూర్వకంగా నమస్కరించుకుంటూ ఉంటామని తెలిపారు. ఆ స్వామి దగ్గర ఇలా జరగడం ఘోరం, పాపం, ఘోరాతి ఘోరం, నికృష్టం, అతినీచం, హేయం, అరాచకం అంటూ ఎంబీ ఆగ్రహం వ్యక్తం చేశారు!

ఈ సందర్భంగా... వినిపిస్తున్న ఆరోపణలు నిజమైతే నేరస్థులను శిక్షించాలని నా ఆత్మీయుడు, నా మిత్రుడు, ఆంధ్రప్రదేశ్ ముఖ్యమంత్రి నారా చంద్రబాబు నాయుడిని హృదయపూర్వకంగా కోరుకుంటూ.. ఈ కలియుగ దైవం వేంకటేశ్వర స్వామి ఆశీస్సులు నా మిత్రుడు అందుకుని నూరేళ్లు చల్లాగా ఉండాలని కోరుకుంటున్నట్లు తెలిపారు. ప్రస్తుతం ఈ ట్వీట్ నెట్టింట హల్ చల్ చేస్తోంది.