10 రోజుల్లో రూ.10 కోట్లు... అసలు విషయం చెప్పిన మోనాలిసా!

యూపీలోని ప్రయాగ్ రాజ్ లో జరిగిన మహా కుంభమేళాలో ఇండోర్ కు చెందిన దండలమ్మే అమ్మాయి మోనీ భోంస్లే సోషల్ మీడియాలో వైరల్ గా మారిన సంగతి తెలిసిందే. ఆమె కళ్లకు, ఆ చూపులకు, ఆమె స్కిన్ టోన్ కు, అమాయకంగా కనిపించే ఆ నవ్వుకు రాత్రికి రాత్రి అన్నట్లుగా సోషల్ మీడియాలో ఫ్యాన్స్ పుట్టుకొచ్చేశారు.

ఇక అక్కడ నుంచి కుంభమేళాకు వెళ్లిన ఆమె ఫ్యాన్స్ ఒకసారి కలుసుకోవడం, ఫోటోలు దిగడం, మీడియా ఛానల్స్ ఇంటర్వ్యూలు చేయడం మొదలైపోయింది. దీనివల్ల ఆమె పని పోతుందనే ఆవేదన ఆమె వ్యక్తం చేసిన పరిస్థితి. ఈ సమయంలో.. 10 రోజుల్లో ఆమె రు.10 కోట్ల వరకూ సంపాదించిందనే ప్రచారం నెట్టింట మొదలైంది. దీనిపై ఆమె స్పందించింది.

అవును.. మహా కుంభమేళాలో దండలమ్మే మోనీ అలియాస్ మోనాలిసా సోషల్ మీడియాలో ఒక్కసారిగా ఫుల్ ఫేమస్ అయిపోయిన సంగతి తెలిసిందే. ఫలితంగా.. ఆమె తన పాపులారిటీతో గడిచిన 10 రోజుల్లో సుమారు రూ.10 కోట్లు సంపాదించిందంటూ ప్రచారం మొదలైంది. ఈ నేపథ్యంలో ఈ ప్రచారంపై మోనాలిసా స్పందించింది. ఆ ప్రచారాన్ని ఖండించింది.

ఈ సందర్భంగా... తాను అంత డబ్బు సంపాదించినట్లయితే.. ఇక్కడ ఎందుకు నివసిస్తున్నాను.. ఇంకా దండలు ఎందుకు అమ్ముతున్నాను? అంటూ ఎదురు ప్రశ్నించింది. దీంతో... సోషల్ మీడియా అంటే అంతే.. ఎవరిని ఎప్పుడు ఫేమస్ చేస్తుందో.. ఎవరిపై ఎప్పుడు డ్యామేజ్ చేస్తుందో తెలియదు అనే విషయం మోనాలిసాకు తెలిసి ఉంటుందని అంటున్నారు.

వాస్తవానికి ఇండోర్ కు చెందిన మోనాలిసా తన కుటుంబంతో కలిసి మహా కుంభమేళాలో రుద్రాక్షలు, ముత్యాల దండలు అమ్ముతూ కనిపించింది. ఈ సమయంలో ఆమె లుక్స్ కి కనెక్ట్ అయిన కొంతమంది.. ఆమెకు సంబంధించిన ఫోటోలు, వీడియోలు నెట్టింట పోస్ట్ చేసి, "మహా కుంభ్ మోనాలిసా", "నేచురల్ బ్యూటీ" అంటూ రాసుకొచ్చారు.

దీంతో ఆమెకు నెట్టింట ఫాలోయింగ్ పెరిగిపోయింది. ఈ క్రమంలో యూట్యూబర్ ల నుంచి సాధారణ ప్రజల వరకు ఆమెను ఇంటర్వ్యూ చేయడం మొదలుపెట్టారు.. ఫోటోలు తీసుకోవడం ప్రారంభించారు. ఈ సమయంలో అప్రమత్తమైన ఆమె తండ్రి.. ఈ పరిస్థితి నుంచి తన కుమార్తెను రక్షించుకోవాలని భావించి.. ఊరికి పంపించేశారు!

ఆ సందర్భంగా స్పందించిన మోనాలిసా.. తన కుటుంబం, తన భద్రత కోసం తాను ఇండోర్ కు తిరిగి వెళ్లాలని.. వీలైతే వచ్చే మహా కుంభమేళాలో కలుద్దామని తన ఫాలోవర్స్ కు చెప్పి వెళ్లిపోయింది. ఈ సమయంలోనే... ఆమె 10 రోజుల్లో రూ.10 కోట్లు సంపాదించిందంటూ ప్రచారం జరిగింది. ఆ ప్రచారాన్ని ఆమె తాజాగా ఖండించింది.