రెండు కళ్లూ చాలవు... ఎవరెస్ట్ ని ఇలా ఎప్పుడైనా చూశారా?

ప్రపంచంలోనే అత్యంత ఎత్తయిన శిఖరమైన ఎవరెస్ట్ గురించి, హిమాలయ ప్రాంతంలోని దాని అందం గురించి ప్రత్యేకంగా చెప్పనవసరం లేదు. భారతదేశానికి ఉత్తరాన్న ఉన్న ఈ ప్రకృతి వరం అద్భుతం, అత్యద్భుతం. ఇక ప్రపంచంలోనే ఎత్తయిన ఈ శిఖరాన్ని అధిరోహించాలని చాలా మంది అనుకుంటారు.. కొంతమంది సాధిస్తుంటారు.

మరికొంతమంది మాత్రం ఆ వాతావరణ పరిస్థితుల్ని తట్టుకోలేకో, ఆర్థిక స్తోమత లేకో, మరో కారణంతోనో తమ చిరకాల కోరికను అణిచివేసుకుంటుంటారు. అలాంటివారి కోసం చైనాకి చెందిన డ్రోన్ తయారీ సంస్థ డీజేఈ గ్లోబల్ తాజాగా ఓ వీడియోను విడుదల చేసింది. డ్రోన్ సాయంతో చిత్రీకరించిన ఈ వీడియో అద్భుతంగా ఉంది!

ఈ అద్భుతమైన తాజా వీడియో ఎవరెస్ట్ వద్ద ఉన్న పరిస్థితులను కళ్లకు కట్టినట్లు చూపించింది. ప్రస్తుతం ఈ వీడియో నెట్టింట వైరల్ గా మారింది. సముద్ర మట్టానికి సుమరు 3,500 మీటర్ల ఎత్తులో ఉన్న బేస్ క్యాంప్ నుంచి ఈ డ్రోన్ ను ప్రయోగించారు. ఎవరెస్ట్ శిఖరం అగ్రభాగం మీదుగా వెళ్తూ.. అక్కడి దృశ్యాలను ఈ డ్రోన్ చిత్రీకరించింది.

ఈ వీడియోలో ఎవరెస్ట్ శిఖరం ఎక్కుతున్న వారు, దిగుతున్న వారూ కూడా కనిపిస్తున్నారు! అంతే కాకుండా శిఖరానికి సంపీపంలో తెల్లటి మంచు దుప్పటి కప్పినట్లు ఉన్న చుట్టుపక్కల ప్రంతాలు కనివిందు చేస్తున్నాయి. ఇలా ఎవరెస్ట్ శిఖరాన్ని పూర్తిగా చూపించే అరుదైన వీడియో కావడంతో ఈ వీడియో వైరల్ గా మారింది. మీరూ ఓ లుక్కేయండి!!