వేగంగా డ్రైవ్ చేస్తూ దంపతుల్ని ఢీ కొట్టిన సినీ నటుడు

మనం ఎంత జాగ్రత్తగా ఉన్నా.. ఎదుటోళ్లు చేసే తప్పులకు.. బలి అయిపోవటం తెలిసిందే. తాజాగా అలాంటి ఘోరం బెంగళూరు మహానగరంలో చోటు చేసుకుంది. ఒక నటుడి ర్యాష్ డ్రైవింగ్ ఒక నిండు ప్రాణాన్ని బలి తీసుకోవటమే కాదు.. ఒక కుటుంబాన్ని చెల్లాచెదురు చేసిన వైనం చోటు చేసుకుంది. తగరు.. పాళ్య.. ఇక్కత్ తదితర కన్నడ చిత్రాల్లో నటించిన నటుడు నాగభూషణ అనే నటుడి నిర్లక్ష్యపు డ్రైవింగ్ కు ఒకరు బలి అయ్యారు.

ఉత్తరహళ్లి నుంచి కొననకుంటేకు కారులో వెళుతున్న వేళ.. వసంతపుర మొయిన్ రోడ్డు వైపు తన కారులో వేగంగా వెళుతున్నాడు. అదే సమయంలో ఫుట్ పాత్ మీద వెళుతున్న ప్రేమ, క్రిష్ణ దంపతుల్ని ర్యాష్ డ్రైవింగ్ కారణంగా ఢీకొన్నారు. ఈ ప్రమాదంలో ఆ జంట తీవ్రంగా గాయపడింది. దీంతో.. వారిని ఆసుపత్రికి తరలిస్తుండగా.. ప్రేమ మరణించినట్లుగా వైద్యులు తెలిపారు.

తీవ్ర గాయాల బారిన పడిన క్రిష్ణ ఆసుపత్రిలో చికిత్స పొందుతున్నాడు. మితిమీరిన వేగం.. నిర్లక్ష్యపు డ్రైవింగ్ కారణంగానే తాజా ప్రమాదం చోటు చేసుకున్నట్లుగా పోలీసులు అనుమానిస్తున్నారు. కేసు నమోదు చేసిన పోలీసులు విచారణ జరుపుతున్నారు. ఒకరి నిర్లక్ష్యం ఒక కుటుంబానికి తీరని నష్టం వాటిల్లేలా చేసిందన్న విమర్శలు వెల్లువెత్తుతున్నాయి.