అర్థరాత్రి మహిళలు అసభ్యకర మెసేజ్ లు... కోర్టు కీలక తీర్పు!

తెలిసిన వారు కొంతమంది.. తెలియనివారు ఇంకొంతమంది.. మహిళలకు అర్థరాత్రులు అభ్యంతరకర, అసభ్యకర మెసేజ్ లు పెడుతుంటారు.. తర్వాత చిక్కులు కొని తెచ్చుకుంటారు. మద్యం మత్తులో పెడుతుంటారో.. మానసిక పరిస్థితి బాగోక పెడుతుంటారో తెలియదు కానీ.. ఇలాంటి అసభ్యకర పనులకు పూనుకుంటారు.

ఈ క్రమంలో.. ఇలాంటి పనికి పూనుకున్న ఓ వ్యక్తికి తాజాగా ముంబై కోర్టు షాకిచ్చింది. "నువ్వు స్లిమ్ గా ఉన్నావ్.. చాలా అందంగా ఉన్నావ్.. నువ్వంటే నాకు ఇష్టం.." అంటూ గుర్తు తెలియని మహిళకు మెసేజ్ లు చేయడం అసభ్యకరమని ముంబైలోని సెషన్స్ కోర్టు తీర్పు చెప్పింది. ఈ కేసులో.. మెసేజ్ లు పంపిన వ్యక్తిని దోషిగా నిర్ధారిస్తూ జడ్జి కీలక వ్యాఖ్యలు చేశారు.

అవును... ముంబైలో మాజీ కార్పొరేటర్ అయిన మహిళకు ఓ గుర్తు తెలియని వ్యక్తి అర్ధరాత్రి సమయంలో అసభ్యకరమైన, అశ్లీల మెసేజ్ లు పెట్టడం మొదలుపెట్టాడు. దీనిపై ఆమె ఫిర్యాదు చేసింది. వ్యవహారం కోర్టుకు చేరింది. దీంతో.. 2022లో మేజిస్ట్రేట్ కోర్టు నిందితుడిని దోషిగా నిర్ధారించి 3 నెలలు జైలు శిక్ష విధించింది.

దీంతో.. నిందితుడు ఈ తీర్పును సెషన్స్ కోర్టులో ఛాలెంజ్ చేశాడు. ఇతర కారణాలతో పాటు రాజకీయ శత్రుత్వం కారణంగా తనను ఈ కేసులో తప్పుగా ఇరికించారని నిందితుడు పేర్కొన్నాడు. అయితే... కోర్టు ఇతడి వాదనలను తోసిపుచ్చింది. ఈ వాదనలకు ఎలాంటి ఆధారాలు లేవని కోర్టు చెప్పింది.

ఇదే సమయంలో... ఏ స్త్రీ కూడా తన గౌరవాన్ని పణంగా పెట్టి తప్పుడు కేసులో ఇరికించదని పేర్కొంది. నిందితుడు ఆ మహిళకు అశ్లీల వాట్సప్ సందేశాలు, ఫోటోలు పంపాడని ప్రాసిక్యూషన్ నిరూపించిందని కోర్టు తెలిపింది. దీంతో.. మేజిస్ట్రేట్ కోర్టు విధించిన శిక్షను సెషన్స్ కోర్టు జడ్జి సమర్థించారు.