బ్రెజిల్ లో ఒంగోలు అవు సందడి మామూలుగా లేదు.. తెలుసుకోవాల్సిందే!

ఒంగోలు జాతి పశువుల ప్రత్యేకతల గురించి ప్రత్యేకంగా చెప్పనవసరం లేదనే సంగతి తెలిసిందే. దేశవిదేశాల్లో ఈ జాతి పశువుల సందడి పీక్స్ లో ఉంటుంటుంది. ఈ నేపథ్యంలో తాజాగా బ్రెజిల్ మార్కెట్ లో ఒంగోలు జాతీ పశువు రికార్డ్ ధర పలికినట్లు మీడియాలో కథనాలు హల్ చల్ చేస్తున్నాయి. ఇంతకూ ఈ ఆవు ధర ఎంతో తెలుసా?.. అక్షరాలా రూ.41 కోట్లు!

అవును... బ్రెజిల్ మార్కెట్ లో ఒంగోలు జాతి ఆవు ధర రూ.41కోట్లు పలకడం ఇప్పుడు వైరల్ గా మారింది. ఈ ఏడాది ఫిబ్రవరిలో బ్రెజిల్ లో నిర్వహించిన వేలంలో ఒంగోలు జాతీ ఆవు (వియాటినా 19 రకం) ఈ అధిక ధరకు అమ్ముడై, ప్రపంచంలోనే అత్యంత ఖరీదైన ఆవుగా రికార్డ్ సృష్టించిందంటూ కథనాలు వచ్చాయి.

వివరాల్లోకి వెళ్తే... ఒంగోలు జిల్లా కేంద్రానికి సుమారు 12 కి.మీ. దూరంలోని "కరవది" గ్రామం ఒకప్పుడు ఒంగోలు జాతి పశువులకు పెట్టింది పేరు. 1960ల్లో ఈ ఊరికి చెందిన పోలవరపు హనుమయ్య.. ఓ బ్రెజిల్ దేశస్తుడికి ఆవును, ఎద్దును అమ్మగా.. వాటి సంతతికి చెందిన ఆవు ఇప్పుడు అంతర్జాతీయ మార్కెట్ లో రికార్డ్ ధర పలికింది.

దీంతో... పోలవరపు చెంచురామయ్య సంతోషం వ్యక్తం చేశారు. ఈ సందర్భంగా స్పందించిన మాజీ సర్పంచ్ పోలవరపు వెంకట్రామయ్య... తమ గ్రామానికి చెందిన ఆవు వల్ల దేశానికి, రాష్ట్రానికి గొప్ప పేరు రావడం ఆనందంగా ఉందని అన్నారు. ఇదే సమయంలో... ఇప్పటికే ఆ ఎద్దు వీర్యాన్ని బ్రెజిల్ లో భద్రపరిచారని ఒంగోలుకు చెందిన రైతు, డాక్టర్ చుంచు చెలమయ్య అన్నారు!

తెల్లని శరీరం, చూపరులను ఆకట్టుకునే మూపురం, రంకెల్లో రాజసం కలగలిపిన ఈ ఒంగోలు జాతి పశువులు సుమారు 1100 కేజీల బరువుతో బలిష్టంగా ఉంటాయి. ఇవి ఎలాంటి వాతావారణాన్నైనా తట్టుకుంటాయి.. అంత తొందరగా అనారోగ్యానికి గురికావని, చురుగ్గా ఉంటాయని చెబుతున్నారు.

అయితే... ఒకప్పుడు బ్రెజిల్ దేశానికి ఎక్కువగా ఎద్దులను ఎగుమతి చేసిన "కరువది"లోనే ఇప్పుడు ఆ ఎద్దులు ఎక్కువగా లేవని ఆ ఊరికి చెందిన రైతులు వాపోతుండటం గమనార్హం. దీంతో... ఒంగోలు జాతి గిత్తల అభివృద్ధిపై ప్రభుత్వాలు దృష్టి పెట్టాలని రైతు సంఘం నేతలు కోరుతున్నారు.