ప్రపంచాన్ని ఆకర్షించిన ఆ నియోజకవర్గంలో చతుర్ముఖ తీవ్ర పోటీ

తెలంగాణలో ఉన్న ఆ నియోజకవర్గం పేరు తెలంగాణలోనే కాదు.. ఏపీలోనూ చర్చనీయంగా మారింది. జాతీయ స్థాయిలోనూ దాని పేరు చర్చకు వెళ్లింది. ఇంతకూ ఎక్కడుందా? నియోజకవర్గం అని చూస్తే.. అది పూర్తిగా గ్రామీణ నియోజకవర్గం. ఇంతవరకు జరిగిన ఎన్నికల్లో ఎక్కువసార్లు ఒక్క పార్టీనే ఆదరించిన నియోజకవర్గం. అలాంటి సీటు హాట్ హాట్ గా మారి దాదాపు ఏడాది నుంచి జనం నోళ్లలో నానుతోంది. పొత్తులో భాగంగా కేటాయింపులు, పార్టీ మారిన నాయకుడికి టికెట్, అక్కడినుంచి పోటీ చేయాలనుకున్న నేత అధికార పార్టీ టికెట్ దక్కక వేరే పార్టీలోకి, ఆ నియోజకవర్గం వదిలి పక్క నియోజకవర్గం నుంచి పోటీ. ఓ పార్టీని స్థాపించి రాష్ట్రమంతా తిరిగిన నాయకురాలు కోరికోరి ఆ నియోజకవర్గాన్నే ఎంచుకోవడం.. మరో పార్టీ రాష్ట్ర కార్యదర్శి సొంత నియోజకవర్గం కావడం.. ఇలా ఎన్నో ప్రత్యేకతలతోనే మీడియాలో నిలిచింది ఆ సీటు.

బరిలో హేమాహేమీలు.. పాలేరులో వీరులెవరు?

ఓవైపు మాజీ ఎంపీ పొంగులేటి శ్రీనివాసరెడ్డి, మరోవైపు కంగ్రెస్ నుంచి కందాళ ఉపేందర్ రెడ్డి, ఇంకోవైపు సీపీఎం నుంచి ఆ పార్టీ రాష్ట్ర కార్యదర్శి తమ్మినేని వీరభద్రం.. వీరేకాక బీఎస్పీ తొలి జాబితాలోనే చోటు దక్కించుకున్న అల్లిక వెంకటేశ్వరరావు యాదవ్.. ఇక బలం తక్కువైనా బీజేపీ ఉండనే ఉంది. వెరసి పాలేరులో చతుర్ముఖ పోటీ జరగనుంది అని చెప్పొచ్చు. బీజేపీ ఇంకాస్త గట్టిగా ప్రయత్నిస్తే పంచముఖ పోటీగానూ మారడం ఖాయం.

సీపీఎం దిగితే సమీకరణం మారినట్లే..?

పాలేరు నియోజకవర్గం కాంగ్రెస్ కు పెట్టని కోట. రిజర్వుడ్ గా ఉన్నప్పటికీ, 2009లో జనరల్ గా మారిన తర్వాత కూడా పాలేరులో అత్యధిక సార్లు గెలిచింది ఆ పార్టీనే. కానీ, కాంగ్రెస్ కు పాలేరులో అన్నిసార్లూ గట్టి పోటీనిచ్చింది మాత్రం సీపీఎం. 1962 నుంచి 1981 వరకు కాంగ్రె అప్రతిహతంగా గెలుపొందగా, 1983లో సీపీఐ, 1985, 1994లో సీపీఎం విజయం సాధించింది. మాజీ మంత్రి తుమ్మల చేరిక అనంతరం 2016లో తప్ప బీఆర్ఎస్ అక్కడ నేరుగా ఎప్పుడూ గెలవలేదు. 2009, 2014లో రాంరెడ్డి వెంకటరెడ్డి, 2018లో కందాళ హస్తం పార్టీ నుంచే గెలిచారు. అయితే, కందాళ తర్వాత బీఆర్ఎస్ లో చేరారు. ఇప్పుడు ఆ పార్టీ నుంచే పోటీ చేస్తున్నారు. ఇక సీపీఎం రాష్ట్ర కార్యదర్శి తమ్మినేని వీరభద్రం సొంత నియోజకవర్గం. ఆయన ఇక్కడినుంచి 2009లో పోటీ చేశారు కూడా. దాదాపు 59 వేల ఓట్లు సాధించారు. ఎటుచూసినా సీపీఎంకు ఇక్కడ 30 వేలపైనే ఓటు బ్యాంకు ఉంది. మరిప్పుడు ఆ పార్టీ రాష్ట్ర కార్యదర్శే పోటీకి దిగుతుండడంతో ప్రభావం కచ్చితంగా ఉంటుందని చెప్పొచ్చు.

షర్మిల పోయే.. తుమ్మల మారె.. పొంగులేటి వచ్చె

పాలేరుకు ఉన్న మరో ప్రత్యేకత ఏమంటే.. ఈ ఎన్నికలలో ఇక్కడినుంచి పోటీ చేస్తానని ముందుంగా ప్రకటించింది వైఎస్సార్టీపీ చీఫ్ వైఎస్ షర్మిల. కానీ, అంతని ఇంతని ఆమె పార్టీ పూర్తిగా ఎన్నికలకు దూరంగా ఉంది. ఇక 2016లో బీఆర్ఎస్ అభ్యర్థిగా రికార్డు మెజార్టీతో పాలేరు నుంచి గెలిచిన తుమ్మల 2018లో ఓడారు. ఈసారి మళ్లీ టికెట్ వస్తుందని ఆశపెట్టుకుని భంగపడ్డారు. దీంతో కాంగ్రెస్ లో చేరి పాలేరు టికెట్ ఆశించారు. సమీకరణాల ప్రకారం చివరకు ఖమ్మంకు మారారు. అన్నిటికి మించి 2014లో దాదాపు సొంత బలంతో ఖమ్మం నుంచి వైసీపీ ఎంపీగా గెలిచిన పొంగులేటి శ్రీనివాసరెడ్డి పాలేరు కాంగ్రెస్ అభ్యర్థిగా బరిలో దిగారు. అటు పొంగులేటి, ఇటు కందాళ, మధ్యలో తమ్మినేని నడుమ పాలేరులో ఉత్కంఠభరిత పోరు ఖాయం.