సంధ్య థియేటర్ తొక్కిసలాటలో ముగ్గురు అరెస్ట్... ఎవరెవరంటే..?

అల్లు అర్జున్ నటించిన "పుష్ప-2" సినిమా చూసేందుకు కుటుంబంతో పాటు వచ్చిన ఓ మహిళ తొక్కిసలాటలో మృతిచెందిన ఘటన తీవ్ర కలకలం రేపిన సంగతి తెలిసిందే. ఈ ఘటనలో మహిళ మృతి చెందగా.. ఆమె కుమారుడు చికిత్స పొందుతున్నాడు. ఈ ఘటనపై స్పందించిన అల్లు అర్జున్.. రూ.25 లక్షలు పరిహారం ప్రకటించారు.

ఈ వ్యవహారంపై స్పందించిన సెంట్రల్ జోన్ డీసీపీ... కీలక విషయాలు వెల్లడించారు. ఈ సందర్భంగా... బాధితుల ఫిర్యాదు మేరకు థియేటర్ యాజమాన్యం, అల్లు అర్జున్, అతని భద్రతా సిబ్బందిపై కేసులు నమోదు చేసినట్లు తెలిపారు. మరోపక్క ఈ వ్యవహారంపై తెలంగాణ సర్కార్ కూడా స్ట్రాంగ్ గా స్పందిస్తూ కీలక నిర్ణయం తీసుకుంది.

ఇందులో భాగంగా... ఈ ఘటనపై స్పందించిన మంత్రి కోమటిరెడ్డి వెంకటరెడ్డి.. థియేటర్ వద్ద జరిగిన సంఘటన బాధ కలిగించిందని అన్నారు. రేవతి మృతిపట్ల సంతాపం వ్యక్తం చేశారు. ఇక నుంచి బెనిఫిట్ షోలకు అనుమతి ఇవ్వమంటూ సంచలన ప్రకటన చేశారు. ఈ సమయంలో... జాతీయ మానవ హక్కుల కమిషన్ లో కీలక పరిణామం చోటు చేసుకుంది!

పుష్ప-2 సినిమాపై జాతీయ మానవ హక్కుల కమిషన్ (ఎన్.హెచ్.ఆర్.సీ) కు ఫిర్యాదు అందగా.. ఈ పిటిషన్ ను విచారణకు స్వీకరించింది. దీనిపై దర్యాప్తు జరపనుంది. ఈ సమయంలో ఓ కీలక విషయం తెరపైకి వచ్చింది. ఇందులో భాగంగా... సంధ్య థియేటర్ ఘటనలో ముగ్గురుని అరెస్ట్ చేశారు.

అవును... అల్లు అర్జున్ పుష్ప-2 విడుదల సందర్భంగా హైదరాబాద్ లోని సంధ్య థియేటర్ లో జరిగిన తొక్కిసలాట కేసులో ముగ్గురుని పోలీసులు అరెస్ట్ చేసినట్లు ఏసీపీ తెలిపారు. మృతురాలి కుటుంబ సభ్యుల ఫిర్యాదు మేరకు కేసు నమోదు చేసుకున్న పోలీసులు ముగ్గురిని అదుపులోకి తీసుకున్నట్లు వెల్లడించారు.

ఈ సందర్భంగా... థియేటర్ యాజమాన్యంలో 8మంది పార్ట్ నర్స్ ఉన్నారని.. వీరిలో ఒకరైన సందీప్ ని అదుపులోకి తీసుకున్నట్లు తెలిపారు. ఈయనతోపాటు లోయర్, అప్పర్ బాల్కనీ ఇన్ ఛార్జ్ విజయ్ చందర్.. సీనియర్ మేనేజర్ నాగరాజును అరెస్ట్ చేసి చంచల్ గూడ జైలుకు రిమాండుకు తరలించినట్లు ఏసీపీ వెల్లడించారు.