జగన్ దగ్గర నంబర్ టూ అంటే...రఘురామ సంచలన వ్యాఖ్యలు

వైసీపీ అధినేత మాజీ సీఎం వైఎస్ జగన్ మీద ట్రిపుల్ ఆర్ గా మీడియా పేర్కొనే ఉప సభాపతి రఘురామ క్రిష్ణంరాజు సంచలన వ్యాఖ్యలు చేశారు. జగన్ ని ఆయన ఒక యునిక్ క్యారెక్టర్ గా అభివర్ణించారు. ఆయన దగ్గర ఎవరూ ఉండలేరు పనిచేయలేరని అన్నారు. జగన్ కూడా ఎవరినీ దగ్గర ఉంచుకోలేరని ఆయన హాట్ కామెంట్స్ చేశారు. మరి కాస్త ముందుకు వెళ్ళి చీమూ నెత్తురూ ఉన్న వారు ఎవరైనా జగన్ దగ్గర వైసీపీలో పని చేయలేరని రఘురామ అన్నారు.

జగన్ పార్టీలో ఎవరూ ఉండరని తాను ఎన్నికలలో ఆ పార్టీ ఓటమి తరువాత చెప్పాను అని గుర్తు చేశారు. లోక్ సభలో ఆ పార్టీ నంబర్ పెద్దగా లేదని రాజ్యసభలో కూడా ఒకరిద్దరు తప్ప ఎవరూ మిగలరని జోస్యం చెప్పినట్లుగా తెలిపారు.

వైసీపీలో మొదటి నుంచి ఉంటూ ఆ పార్టీలో నంబర్ టూగా ఎదిగిన విజయసాయిరెడ్డి బయటకు వెళ్ళడం మీద రఘురామ మాట్లాడుతూ ఇప్పటికే ఆలస్యం అయింది అని అన్నారు. రెండు మూడు నెలల క్రితమే విజయసాయిరెడ్డి బయటకు వచ్చేయాల్సి ఉందని అన్నారు.

జగన్ దగ్గర ఇపుడు నంబర్ టూగా సజ్జల రామక్రిష్ణారెడ్డి ఉన్నారని గుర్తు చేయగా ఆయన కాదు ఎవరైనా నంబర్ టూ అంటే బయటకు పోవడానికి సిద్ధంగా ఉండాల్సిందే అన్నారు. నంబర్ టూ అన్నది వైసీపీలో చాలా రిస్క్ అని ఆయన అన్నారు.

ఈ సందర్భంగా ఆయన ఒక చారిత్రక కధను వినిపించారు. శ్రీకృష్ణదేవరాయల కోసం ఎంతో చేసి ఆయనను ప్రాణాలతో పాటు రాజ్యం కూడా ఇచ్చి కాపాడిన మహా మంత్రి తిమ్మరుసుకు చివరికి ఏమి జరిగిందని ప్రశ్నించారు. ఆయన కళ్ళూ పెకిలించి కారాగారంలో పెట్టారని అన్నారు. అందువల్ల నంబర్ టూ అంటే ఎపుడూ రిస్క్ ఫ్యాక్టర్ ఉంటుందని అన్నారు.

మరి తిమ్మరుసు ఇక్కడ విజయసాయిరెడ్డిగా రఘురామ పేర్కొన్నారా అన్నదే చర్చగా ఉంది. అంతే కాదు జగన్ వద్ద ఎవరూ ఉండలేరని ఆయన చెప్పడం కూడా అనేక చర్చలకు దారి తీస్తోంది. అంతటితో ఊరుకోకుండా జగన్ ఒక అరుదైన క్యారెక్టర్ అని చెప్పారు.

ఆయన ఎవరినీ ఉంచుకోలేరు అన్నారు. మొత్తం మీద చూస్తే రఘురామ జగన్ ని చాలా దగ్గర నుంచి పరిశీలించి ఈ విషయం చెప్పారా లేక ఒకనాటి రెబెల్ ఎంపీగా చెప్పారా అన్నది కూడా అంతా ఆలోచిస్తున్నారు. రఘురామ విషయానికి వస్తే ఆయనకు వైఎస్సార్ కుటుంబంతో మంచి పరిచయాలు ఉన్నాయి. జగన్ తోనూ ఆయన ఒకనాడు మంచి రిలేషన్స్ మెయింటెయిన్ చేశారు. దాంతో ఆయన పూర్తిగా అన్నీ ఆలోచించే ఈ విధంగా కామెంట్స్ చేశారు అని అంటున్నారు.

ఇక వైసీపీలో ఎవరూ మిగలరు అని కూడా ఆయన అనడం బట్టి చూస్తూంటే రానున్న రోజులలో వైసీపీ నుంచి ఏ రాజ్యసభ సభ్యుడి బయటకు వెళ్తారు అన్న చర్చ కూడా మొదలైంది. చూడాలి మరి ఏమి జరుగుతుందో. మొత్తానికి జగన్ విషయంలో రఘురామ చేసిన ఈ కామెంట్స్ వైరల్ అవుతున్నాయి.