నందమూరి వారి ఇంట్లో రాఖీ పండుగ... బాలయ్య స్పెషల్ సందడి వీడియో వైరల్!

దేశవ్యాప్తంగా రక్షాబంధన్ ఉత్సవాలు ఘనంగా జరిగాయి. ప్రపంచ వ్యాప్తంగా ఉన్న భారతీయులు కూడా ఈ వేడుకను ఘనంగా ఆనందోత్సాహాల మధ్య జరుపుకున్నారు. ఈ నేపథ్యంలో... టాలీవుడ్ విషయానికొస్తే మెగాస్టార్ చిరంజీవి ఇంట్లో జరిగిన రాఖీ పండుగ సంబరాలు నెట్టింట హల్ చల్ చేశాయి. మరోపక్క నందమూరి వారి ఇంట జరిగిన రాఖీ సంబరాల దృశ్యాలు సోషల్ మీడియాలో సందడి చేస్తున్నాయి.

అవును... నందమూరి వారి ఇంట జరిగిన రాఖీ సంబరాలకు సంబంధించిన వీడియో ఇప్పుడు నెట్టింట సందడి చేస్తుంది. ఈ వీడియో బట్టి చూస్తే... నందమూరి బాలకృష్ణ అక్కాచెల్లెళ్లు భువనేశ్వరి, పురందేశ్వరి, లోకేశ్వరి తమ సోదరుడు బాలయ్యకు రాఖీలు కట్టారు. ఈ సమయంలో బాలయ్య సతీసమేతంగా తన వారి పాదాలకు నమస్కరించి ఆశీర్వాదం తీసుకున్నారు.

ఇలా బాలయ్య తనకంటే పెద్దవాళ్ల దగ్గర ఆశీర్వాదం తీసుకొవడంతోపాటు రాఖీ కట్టినందుకు వారికి కానుకలు ఇస్తున్నట్లు కనిపించింది! అనంతరం బాలయ్య తన సోదరీమణులతో కలిసి ఫోటోలు దిగారు. ఈ సంబరాలకు సంబంధించిన దృశ్యాలు ఇప్పుడు సోషల్ మీడియాలో వైరల్ అవుతున్నాయి. ఈ సందర్భంగా... 'బాలయ్య సర్ బాలయ్య అంతే..' అంటూ నెటిజన్లు కామెంట్లు చేస్తున్నారు.

కాగా ఓ పక్క వరుసగా సినిమాలు చేస్తూనే మరోపక్క రాజకీయాల్లోనూ బాలయ్య బిజీబిజీగా గడుపుతున్న సంగతి తెలిసిందే. ఇటీవల జరిగిన ఎన్నికల్లో హిందూపురం నియోజకవర్గం నుంచి మూడోసారి గెలిచి హ్యాట్రిక్ కొట్టిన ఆయన.. అక్కడ పలు అభివృద్ధి కార్యక్రమాలు మొదలుపెట్టారు. అన్నక్యాంటీన్ ను ప్రారంభించారు.

ఇక సినిమాల విషయానికొస్తే ప్రస్తుతం బాబీ దర్శకత్వంలో బాలయ్య తన 109వ సినిమా చేస్తున్న సంగతి తెలిసిందే. ప్రస్తుతానికి ఈ సినిమాకి ఇంకా పేరు పెట్టలేదు. "ఎన్.బీ.కే - 109" తో ప్రచారం జరుగుతుంది. ఇటీవల దానికి సంబంధించిన గ్లింప్స్ విడుదలయ్యాయి. ఇదే క్రమంలో ‘అన్ స్టాపబుల్ షో’కి సంబంధించిన పనులూ శరవేగంగా జరుగుతున్నాయి.