ఎయిర్ పోర్టులో 14.8 కేజీల బంగారం పట్టివేత.. సినీ నటి అరెస్ట్

బెంగళూరు కెంపేగౌడ అంతర్జాతీయ విమానాశ్రయంలో భారీగా బంగారం పట్టుబడింది. దుబాయ్ నుండి వచ్చిన కన్నడ సినీ నటి రన్యా రావు వద్ద నుంచి 14.8 కిలోల బంగారం స్వాధీనం చేసుకున్నట్లు DRI (డైరెక్టరేట్ ఆఫ్ రెవెన్యూ ఇంటెలిజెన్స్) అధికారులు తెలిపారు.

- తరుచుగా దుబాయ్ ప్రయాణాలు.. అధికారులు అనుమానం

రన్యా రావు ఇటీవల తరచుగా దుబాయ్ వెళ్లి వస్తున్నారని అధికారులు గుర్తించారు. గత 15 రోజుల్లోనే 4 సార్లు ఆమె దుబాయ్ వెళ్లినట్లు రికార్డులు చెబుతున్నాయి. ఈ అనుమానాస్పద కార్యకలాపాలపై నిఘా ఉంచిన అధికారులు ఎయిర్ పోర్టులో ఆమెను అదుపులోకి తీసుకుని తనిఖీలు చేపట్టారు.

-అధిక మొత్తంలో బంగారం పట్టివేత

రన్యా రావు లగేజీని పరిశీలించగా 14.8 కిలోల బంగారం దొరికినట్లు అధికారిక వర్గాలు వెల్లడించాయి. తగిన ఆధారాలను సమర్పించలేకపోవడంతో ఆమెను అదుపులోకి తీసుకుని విచారణ జరుపుతున్నారు. ఈ ఘటనపై DRI బృందం ముమ్మరంగా విచారణ చేపట్టింది. బంగారం స్మగ్లింగ్ వ్యవహారంలో రన్యా రావుకు ఎవరైనా సహకరించారా? మరో పెద్ద ముఠా ఉన్నదా? అనే కోణంలో అధికారులు దర్యాప్తును కొనసాగిస్తున్నారు.

-రన్యా రావు ఎవరు?

రన్యా రావు కన్నడ చిత్రసీమలో నటిగా గుర్తింపు పొందారు. కిచ్చా సుదీప్ హీరోగా నటించిన ‘మాణిక్య’ చిత్రంతో తెరంగేట్రం చేశారు. ఆ తర్వాత ఆమె 'మాస్టర్ పీస్', 'చంద్రిక', వాఘా , పటాకీ వంటి చిత్రాల్లో నటించారు. అయితే, ఆమెకు స్మగ్లింగ్ సంబంధం ఉందా? లేక కేవలం ఎవరైనా ఇరికించారా? అన్నది విచారణలో తేలాల్సి ఉంది.

ఈ కేసుకు సంబంధించి పూర్తి వివరాలను అధికారులు త్వరలో వెల్లడించనున్నారు. బంగారం స్మగ్లింగ్ కేసులు దేశంలో రోజురోజుకు పెరుగుతున్న నేపథ్యంలో నటిపై అనుమానంతో ఆమెను అరెస్ట్ చేయడం తీవ్ర చర్చనీయాంశంగా మారింది.