తీగ లాగితే దొరికిన 'అంత‌ర్జాతీయ గోల్డ్ స్మ‌గ్లింగ్ సిండికేట్'

కన్నడ నటి రన్యా రావు 14 కిలోగ్రాముల బంగారాన్ని దుబాయ్ నుంచి భార‌త్ కి త‌ర‌లిస్తూ రెడ్ హ్యాండెడ్‌గా పట్టుబడిన సంగతి తెలిసిందే. బంగారం స్మగ్లింగ్ ఆపరేషన్‌లో పాల్గొన్నందుకు ర‌న్యా రావు అరెస్టు అయ్యారు. పోలీసుల విచారణలో బంగారం స్మగ్లింగ్‌లో పాల్గొన్న అంతర్జాతీయ మహిళల సిండికేట్ గురించి కీలకమైన విషయాలను రన్యా వెల్లడించింద‌ని స‌మాచారం.

కొంద‌రు మహిళలు ఈ స్మగ్లింగ్ నెట్‌వర్క్‌లో ఉండ‌గా, తాను కూడా భాగమ‌య్యాన‌ని రన్యా అంగీకరించింది. ఈ బృందం అంతర్జాతీయ స్థాయిలో స్మ‌గ్లింగ్ చేస్తుంది. కొంతమంది ప్రభుత్వ ఉద్యోగులు కూడా ఈ సిండికేట్‌తో సంబంధం కలిగి ఉన్నారని ఆరోప‌ణ‌లు ఉన్నాయి. ఈ అక్రమ కార్యకలాపాలలో పాల్గొన్న ఇతర సభ్యుల కోసం పోలీసులు ఇప్పుడు వెతుకుతున్నారు.

డైరెక్టరేట్ ఆఫ్ రెవెన్యూ ఇంటెలిజెన్స్ (DRI) ర‌న్యా గురించిన స‌మ‌స్త‌ స‌మాచారం తెలుసుకుని, త‌న‌ను వెంబ‌డించ‌గా చివ‌రికి ఆమె ప‌ట్టుబ‌డింది. అనంత‌రం ర‌న్యా నివాసంలో తదుపరి సోదాల్లో, చట్ట అమలు అధికారులు లక్షలాది రూపాయల విలువైన ఆభరణాలను స్వాధీనం చేసుకున్నారు. రన్యా ప్రకటనల తర్వాత సెంట్రల్ బ్యూరో ఆఫ్ ఇన్వెస్టిగేషన్ (CBI) ఇప్పుడు ఈ కేసు బాధ్యతను చేపట్టింది. వారు సిండికేట్ కార్యకలాపాలను నిశితంగా పరిశీలిస్తున్నారు. అంతర్జాతీయ బంగారం స్మగ్లింగ్ నెట్‌వర్క్‌లో పాల్గొన్న ఇతర సభ్యుల గుట్టును వెలికితీసేందుకు కృషి చేస్తున్నారు.