30 ఏళ్ల తర్వాత జ్ఞానవాపిలో అరుదైన దృశ్యం!

"జ్ఞానవాపి" ప్రార్థనా మందిరంలోని సీల్‌ చేసి ఉన్న ప్రాంతంలో పూజలు చేసుకునేందుకు హిందువులకు వారణాసి కోర్టు అనుమతినిచ్చిన సంగతి తెలిసిందే. దీనికి అనుగుణంగా వారం రోజుల్లోగా పూజాకర్యక్రమాలు చేసుకొవడానికి ఏర్పాట్లు చేయాలని స్థానిక యంత్రాంగాన్ని కోర్టు ఆదేశించింది. దీంతో... ఈ విషయం దేశవ్యాప్తంగా తీవ్ర చర్చనీయాంశం అయ్యింది. ఈ సమయంలో జ్ఞానవాపిలో సుమారు 30ఏళ్ల తర్వాత జ్ఞానవాపిలో అరుదైన దృశ్యం కనిపించింది.

అవును... ఉత్తరప్రదేశ్ లోని వారణాసిలో గల జ్ఞానవాపి మసీదులోని బేస్ మెంట్ లో సుమారు 30 ఏళ్ల తర్వాత పూజలు ప్రారంభమయ్యాయి. ఈ క్రమంలో... వారణాసి కోర్టు తీర్పు వెలువరించిన అనంతరం అతితక్కువ వ్యవధిలోనే పూజలు జరగడం గమనార్హం. ఇందులో భాగంగా... వ్యాస్‌ కా తెహఖానా (వ్యాసుడి నేలమాళిగ) బేస్ మెంట్ లో ఉదయం 3 గం.కే విగ్రహాలకు తొలి పూజ ప్రారంభమైంది.

వాస్తవానికి తీర్పు వెళ్లడించిన అనంతరం... వారం లోపు పూజలు ప్రారంభిస్తామని కాశీ విశ్వనాథుడి ట్రస్ట్‌ ప్రకటించినప్పటికీ.. సత్వరమే ఆ ఏర్పాట్లను పూర్తి చేసి పూజలు మొదలుపెట్టింది. ఇందులో భాగంగా... విశ్వనాథుడి ఆలయ పూజారి విగ్రహాలకు మంగళహారుతులు ఇచ్చారు. ఈ సమయంలో... రాష్ట్రీయ హిందూ దళ్‌ సభ్యులు మసీద్‌ సమీపంలో "మందిర్‌" (ఆలయం) అనే బోర్డును అంటించారు.

కాగా... జ్ఞానవాపి విషయంలో ఇటీవల వారణాసి కోర్టు ఇచ్చిన తీర్పుపై విశ్వహిందూపరిషత్ (వీ.హెచ్.పీ) అధ్యక్షుడు అలోక్ కుమార్ స్పందించారు. ఇందులో భాగంగా... ఈ తీర్పు ప్రతి హిందువు హృదయంలో సంతోషాన్ని నింపిందని అన్నారు.

ఇదే సమయంలో... "శివ భక్తులకు న్యాయం జరిగింది. ఈ క్రమంలో... విశ్వనాథుని ఆలయ సముదాయంలోగల వ్యాసుని నేలమాళిగలో పూజలు చేసుకునే హక్కును కల్పిస్తూ న్యాయస్థానం ఇచ్చిన తీర్పును హృదయపూర్వకంగా స్వాగతిస్తున్నాను" అంటూ ఉత్తర ప్రదేశ్ ఉప ముఖ్యమంత్రి కేశవ్ ప్రసాద్ మౌర్య ఆన్ లైన్ వేదికగా ఎక్స్ లో స్పందించారు.