రేవంత్, భట్టి, ఈటల, సంజయ్.. ‘‘సీఎం’’ కామెంట్లతో సెంటిమెంటు!

బూర్గుల రామక్రిష్ణారావుకు వచ్చిన అవకాశం మీ కొడంగల్ బిడ్డకు రానుంది. అందుకే ఈసారి గెలిపించి ఆశీర్వదించండి.., జలగం వెంగళరావుకు దక్కిన భాగ్యం మధిర ఎమ్మెల్యేగా నాకు కలగనుంది.. మళ్లీ గెలిపించండి.. ‘‘పేద వాడికి సీఎం చాన్స్ దక్కనుంది.. నన్ను ఆదరించండి’’.. ‘‘నేనే సీఎం.. మోదీ బీసీ నేతలను పిలిచి మరీ చెప్పారు’’ ఇవీ.. రాష్ట్రంలో కీలక నేతలైన టీపీసీసీ చీఫ్ రేవంత్ రెడ్డి, సీఎల్పీ నేత భట్టి విక్రమార్క, బీజేపీ ఎంపీ, కరీంనగర్ అభ్యర్థి బండి సంజయ్, బీజేపీ కీలక నేత ఈటల రాజేందర్ గత కొన్ని రోజులుగా చేసిన వ్యాఖ్యలు. పరోక్షంగానే వీరంతా తాము ముఖ్యమంత్రి అవకాశం ముంగిట ఉన్నామని.. ప్రజలు దీవించాలని కోరారు. కాగా, రెండు జాతీయ పార్టీలకు చెందిన రాష్ట్ర స్థాయి నాయకులు ఇలాంటి ప్రకటనలు చేయడం విశేషమే.

పార్టీ చెప్పలేదు.. వీరే చెబుతున్నారు

రేవంత్, భట్టిని గానీ.. ఈటల, సంజయ్ ని గానీ.. ముఖ్యమంత్రి అభ్యర్థులని వారి పార్టీలు కాంగ్రెస్, బీజేపీలు చెప్పలేదు. అందులోనూ ఈ రెండూ జాతీయ పార్టీలు. రాష్ట్ర ముఖ్యమంత్రి ఎవరో జాతీయ పార్టీలు ఎప్పుడూ ముందుగా ప్రకటించవు. గెలుపు అనంతరం మెజార్టీ ఎమ్మెల్యేల అభిప్రాయం ప్రకారమే ముందుకెళ్తాయి. అందులోనూ నాయకత్వ సమస్య అధికంగా ఉన్నచోట అసలే నోరు మెదపవు. కానీ, ఈ నలుగురు నేతలు తామే సీఎం అంటూ పరోక్షంగా హింట్ ఇస్తున్నారు.

సెంటిమెంటు రగిలిస్తున్నారా?

2009, 2014 ఎన్నికల్లో కొడంగల్ నుంచి విజయ ఢంకా మోగించిన టీపీసీసీ చీఫ్ రేవంత్ రెడ్డి.. 2018లో మాత్రం పరాజయం పాలయ్యారు. పట్టుబట్టి మరీ రేవంత్ ను ఓడించింది బీఆర్ఎస్. అయితే, అప్పటికి ఆయన టీపీసీసీ చీఫ్ కాదు. ఈసారి మాత్రం రేవంత్ రాష్ట్ర పార్టీ అధ్యక్షుడిగా కీలక బాధ్యతల్లో ఉన్నారు. కాంగ్రెస్ గెలిస్తే రాష్ట్రంలో సీఎం అభ్యర్థిగా ముందువరుసలో ఆయన పేరే వినిపిస్తుంది. కానీ, కొడంగల్ లో రేవంత్ ను కట్టడి చేయాలని బీఆర్ఎస్ విశ్వప్రయత్నం చేస్తోంది. దీంతోనే ఆయన ‘‘బూర్గులకు దక్కిన అవకాశం మీ కొడంగల్ బిడ్డకు దక్కనుంది’’ అని వ్యాఖ్యానించారు. ఉమ్మడి మహబూబ్ నగర్ జిల్లా షాద్ నగర్ కు చెందిన బూర్గుల హైదరాబాద్ స్టేట్ సీఎంగా పనిచేశారు. ఆ తర్వాత ఉమ్మడి మహబూబ్ నగర్ వారు ఎవరికీ ఈ స్థాయి అవకాశం దక్కలేదు. బూర్గుల పేరును ప్రస్తావించడం ద్వారా రేవంత్ వ్యూహాత్మక ఎత్తు వేశారని తేలుతోంది. ఇక మధిర నుంచి మూడుసార్లు గెలిచిన భట్టి.. సీఎల్పీ నేతగా కీలక బాధ్యతలు నిర్వర్తించారు. పాదయాత్ర ద్వారా ప్రజల్లో నిలిచారు. అధిష్ఠానం వద్ద మంచి మార్కులూ పొందారు. అందుకనే.. ఉమ్మడి ఖమ్మం నుంచి ఉమ్మడి రాష్ట్ర సీఎంగా పనిచేసిన జలగం వెంగళరావును ఉదహరిస్తూ తనను గెలిపించాలని కోరుతున్నారు.

బీజేపీలో సీఎం లొల్లి..

కాంగ్రెస్ కంటే క్రమశిక్షణ కలిగిన పార్టీ అయిన బీజేపీలోనూ సీఎం పంచాయితీ సాగుతోంది. గెలుపు అవకాశాలను పక్కనపెడితే ఇప్పటికే ఆ పార్టీ బీసీని సీఎం చేస్తానని ప్రకటించింది. అయితే ,ఈ లోగానే కరీంనగర్ ఎంపీ బండి సంజయ్, హుజూరాబాద్ ఎమ్మెల్యే, కీలక నేత ఈటల రాజేందర్ చేసిన ప్రకటనలు ఆశ్చర్యపరుస్తున్నాయి. బీసీ సీఎం ప్రకటనలో భాగంగా.. సాక్షాత్తు ప్రధాని మోదీనే తనను సీఎం క్యాండెట్ గా పార్టీ నాయకులకు చెప్పారని ఈటల ఇంగ్లిష్ మీడియాకు ఇచ్చిన ఇంటర్వ్యూలో పేర్కొన్నారు. దీనిపై ఆ పార్టీ మిగతా నాయకులు ఎలా స్పందిస్తారో చూడాల్సి ఉంది. ఇక సంజయ్ సైతం.. ‘‘నిరుపేదకు సీఎం చాన్స్’’ అంటూ వ్యాఖ్యానించారు. ఎన్నికల అఫిడవిట్ ప్రకారం చాలా తక్కువ ఆస్తులున్న సంజయ్ నిరుపేద నాయకుడిగా నిలిచారు. దానిని ఉద్దేశిస్తూనే.. తాజాగా ఆయన నిరుపేదకు పెద్ద పదవి అంటూ తన మనసులోని మాటను బయటపెట్టారు. మొత్తానికి రెండు జాతీయ పార్టీల్లోని నలుగురు నాయకులు ముఖ్యమంత్రి కావాలన్న తమ ఉద్దేశాన్ని వెల్లడించారు.