"కళ్లజోడు తీస్తే మీలాంటి వాడ్నే"... రేవంత్ రెడ్డి వీడియో వైరల్!

ముఖ్యమంత్రి అయిన తర్వాత తొలి దసరా పండగను రేవంత్ రెడ్డి తన సొంతూరు అయిన కొండారెడ్డి పల్లి గ్రామంలో అంగరంగ వైభవంగా జరుపుకున్నారు. అనుకున్నట్లుగానే ఈ దసరాని తన కుటుంబ సభ్యులు, సన్నిహితులు, స్నేహితులు, బంధువులు, గ్రామ ప్రజలతో కలిసి ఘనంగా జరుపుకున్నారు తెలంగాణ ముఖ్యమంత్రి రేవంత్ రెడ్డి.

ఈ సందర్భంగా తన సొంత ఊరిలో జరిగిన పలు కార్యక్రమాల్లో పాల్గొన్నారు. ఈ సందర్భంగా పలు అభివృద్ధి కార్యక్రమాలకు శంకుస్థాపనలు, ప్రారంభోత్సవాలూ చేశారు రేవంత్. ఈ క్రమంలో రేవంత్ తన దసరా సెలబ్రేషన్స్ అన్నీ కలిపి ప్రత్యేకంగా ఓ వీడియో చెయించి సోషల్ మీడియాలో పంచుకున్నారు. ఇది నెట్టింట హల్ చల్ చేస్తోంది.

అవును.. తన సొంత ఊరు కొండారెడ్డి పల్లిలో జరిగిన దసరా ఉత్సవాల్లో స్వయంగా పాల్గొన్న ముఖ్యమంత్రి రేవంత్ రెడ్డి.. అక్కడ సంబరాలకు సంబంధించిన ఓ వీడియోను సోషల్ మీడియాలో పోస్ట్ చేశారు. ఈ వీడియోకి "గేమ్ ఛేంజర్" సినిమాలోని "రా మచ్చ రా మచ్చ సాంగ్" ని జత చేశారు. ఇప్పుడు ఈ వీడియో వైరల్ గా మారుతోంది.

"కళ్లజోడు తీస్తే మీలాంటి వాడ్నే.. షర్టు పైకి పెడితే మీలాంటి వాడ్నే.. టక్కు టై తీస్తే నీలాంటివాడ్నే.. నాటు బీటు వింటే నీలాంటి వాడ్నే.." అంటూ సాగిన ఈ పాట లిరిక్స్.. సొంత ఊరిలో రేవంత్ తన అభిమానులు, అనుచరులు, ఆత్మీయులు, సన్నిహితులు, సహచరులతో అంటున్నట్లుగా ఉందంటూ కామెంట్ చేస్తున్నారు నెటిజన్లు.

ఈ వీడియోతో పాటు.. "గంటలు క్షణాల్లా గడిచిపోయాయి.. అనుబంధాలు, శాశ్వతమై మిగిలాయి.. కొండారెడ్డిపల్లిలో ఈ దసరా నా జీవన ప్రస్థానంలో ఆత్మీయ అధ్యాయం" అని రేవంత్ జోడించారు.