కువైట్‌ లో విషాదం.. భారతీయ కుటుంబం సజీవ దహనం!

ఇటీవల కాలంలో బ్రతుకు దెరువు కోసం గల్ఫ్ దేశాలకు వెళ్లి నానా రకాల ఇబ్బందులు పడుతున్నవారి సంఖ్య రోజు రోజుకీ పెరుగుతున్న సంగతి తెలిసిందే. ఈ విషయాలకు సంబంధించి పలు ఘటనలు తెరపైకి వచ్చాయి. ఈ నేపథ్యంలో తాజాగా కువైట్ లో జరిగిన అగ్నిప్రమాదంలో ఓ భారతీయ కుటుంబం సజీవదహనం అయ్యింది!

అవును... గల్ఫ్ దేశం కువైట్ లో తాజాగా మరో ఘోర అగ్ని ప్రమాదం చోటు చేసుకుంది. ఈ ప్రమాదంలో ఓ భారతీయ కుటుంబం సజీవదహనం అయినట్లు అక్కడి అధికారులు తాజాగా వెల్లడించారు. శుక్రవారం (జూలై 19) రాత్రి కువైట్ లోని అబ్బాసియా ప్రాంతంలోని ఓ ఫ్లాట్ లో ఈ ప్రమాదం చోటు చేసుకుందని చెబుతున్నారు.

వివరాళ్లోకి వెళ్తే... కేరళకు చెందిన నలుగురు కుటుంబ సభ్యులు కువైట్ లోని అబ్బాసియా ప్రాంతంలో ఓ ఫ్లాట్ లో నివాసముంటున్నారు. ఈ క్రమంలో శుక్రవారం ఆ ఇంట్లో అగ్నిప్రమాదం చోటు చేసుకుంది. ఆ కుటుంబంలోని భార్యభర్తలు, ఇద్దరు పిల్లలు రాత్రి 9 గంటలకు నిద్రపోయిన తర్వాత ఇంట్లో ఒక్కసారిగా మంటలు చేలరేగాయని తెలుస్తుంది.

దీంతో... సమాచారం అందుకున్న పోలీసులు, అగ్నిమాపక సిబ్బంది ఘటనా స్థలానికి చేరుకునేసరికే ఆ కుటుంబం మంటల్లో సజీవదహనం అయ్యిందని అంటున్నారు. మృతిచెందినవారిని మాథ్యూ ములక్కల్ (40), భార్య లిని అబ్రహాం (38), కుమార్తె ఇరిన్ (14), కుమారుడు ఇస్సాక్ (9)గా గుర్తించారని తెలుస్తోంది. దీంతో విషయం తెలుసుకున్న కుటుంబ సభ్యులు కన్నీరుమున్నీరు అవుతున్నారు.

ఈ ఘటనపై కేసు నమోదు చేసుకున్న పోలీసులు.. దర్యాప్తు చేస్తున్నారు. అయితే... ఇంట్లో ఏసీ పవర్ ఫెయిల్యూర్ కారణంగా అగ్నిప్రమాదం జరిగి ఉంటుందని పోలీసులు ప్రాథమికంగా నిర్థారించారు! ఆ సమయంలో వెలువడిన విషపూరిత వాయువును వారు పీల్చుకుని ఉంటారని పోలీసులు అనుమానం వ్యక్తం చేస్తున్నారు.

కాగా... గత నెలలో ఓ అపార్ట్ మెంట్ లో భారీగా మంటలు చెలరేగి సుమారు 49 మంది మరణించగా.. అందులో 45 మంది భారతీయులేనని అధికారులు గుర్తించిన సంగతి తెలిసిందే. అందులో ఇద్దరు తెలుగువారు కూడా ఉండగా.. ఎక్కువమంది తమిళనాడు, కేరళకు చెందినవారే ఉన్నట్లు పేర్కొన్నారు.