జగనే ఆదర్శం మమతకు నో ఆప్షన్.. బెంగాల్‌లో దిశాలాంటి బిల్లు అమల్లోకి..!

దేశంలో రోజురోజుకూ మహిళలపై అఘాయిత్యాలు పెరుగుతూనే ఉన్నాయి. నిత్యం ఏదో ఒక చోట లైంగికదాడులు జరుగుతూనే ఉన్నాయి. పట్టణాల నుంచి గ్రామాల వరకు మహిళలకు రక్షణ లేకుండాపోయింది. చిన్న పిల్లల నుంచి వృద్ధ మహిళలను సైతం వదలకుండా ఈ దారుణాలకు పాల్పడుతున్నారు. తమ కామంతో ఆడవారిని ప్రాణాలు కోల్పోయేలా చేస్తున్నారు.

గతంలో ఓ నిర్భయ, ఓ దిశ, ఓ అభయ ఘటనలు చూశాం. అవి ఇంకా మరువక ముందే ఇటీవల కోల్‌కతాలోని మెడికోపై లైంగికదాడి జరిగింది. ఈ ఘటన సైతం దేశవ్యాప్తంగా తీవ్ర చర్చకు దారితీసింది. కోల్‌కతాలోని ఆర్‌జీ కార్ మెడికల్ కాలేజీ ఆసుపత్రిలో గత నెల 9న జూనియర్ డాక్టర్‌పై ఈ దారుణం జరిగింది. దీనిపై రోజురోజుకూ దేశవ్యాప్తంగా నిరసనలు పెల్లుబికాయి. ఐఎంఏ డాక్టర్లు, మెడికోలు తమ ప్రదర్శనలతో హోరెత్తించారు. దేశంలో సరైన చట్టాలు.. కఠిన శిక్షలు లేకపోవడం వల్లే మృగాళ్లు ఇలా రెచ్చిపోతున్నారని చాలా వరకు మహిళలు అభిప్రాయం వెల్లడించారు. ఈ ఘటనలో మాజీ ప్రిన్సిపల్ డాక్టర్ సందీప్ ఘోష్ అరెస్ట్ చేశారు. అయినప్పటికీ ఆ వేడి ఇంకా చల్లారలేదు.

అయితే.. మరోసారి ఈ ఘటనలు వెలుగుచూడకూడదని బెంగాల్ ప్రభుత్వం కఠిన చట్టం తీసుకొచ్చింది. ఈ మేరకు సంచలన నిర్ణయాలు తీసుకుంది. గతంలో ఏపీలో మాజీ ముఖ్యమంత్రి జగన్మోహన్ రెడ్డి హయాంలో అమల్లోకి తెచ్చిన దిశ తరహా బిల్లును ప్రవేశపెట్టింది. కొద్దిసేపటి క్రితమే అక్కడి అసెంబ్లీలో ఆ బిల్లు ఆమోదం పొందింది. ఈ బిల్లు ప్రకారం.. లైంగికదాడి ఘటనల్లో దోషిగా తేలిన వారికి మరణ శిక్ష విధించనున్నారు.

మహిళలపై లైంగిక దాడికి పాల్పడినా.. మహిళలను హత్య చేసిన ఘటన జరిగిన పది రోజుల్లోనే మరణశిక్ష అమలయ్యేలా ఈ బిల్లును రూపొందించారు. పెరోల్‌కు సైతం అవకాశం లేకుండా జీవిత ఖైదును విధించే వెసులుబాటు తెచ్చారు. ఈ బిల్లుకు అపరాజిత విమెన్ అండ్ చైల్డ్ (పశ్చిమ బెంగాల్ క్రిమినల్ చట్టాల సవరణ) 2024 అని నామకరణం చేశారు. ఈ ఉదయం ముఖ్యమంత్రి మమత బెనర్జీ ఈ బిల్లును అసెంబ్లీలో ప్రవేశపెట్టగా.. ఆ వెంటనే అందరూ ఆమోదం తెలిపారు. అలాగే.. భారతీయ న్యాయ్ సంహిత 2023, భారతీయ నాగరిక్ సురక్ష సంహిత 2023, పిల్లలపై లైంగిక నేరాల నిరోధక చట్టం 2012లోని పలు సెక్షన్లకు కూడా మార్పులను సూచించారు.