ట్రంప్ కోరికతో సునీత విలియమ్స్ కోసం మస్క్ స్పీడ్ పెంచుతారా?

గత ఏడాది జూన్ 6న ఎనిమిది రోజుల మిషన్ లో భాగంగా సునీత విలియమ్స్, బుచ్ విల్ మోర్.. బోయింగ్ స్టార్ లైనర్ క్యాప్సుల్ లో అంతరిక్ష కేంద్రానికి వెళ్లిన సంగతి తెలిసిందే. వాస్తవానికి వీరిద్దరూ అదే నెల 14న భూమికి తిరుగుపయనం కావాల్సి ఉంది. అయితే.. వ్యోమనౌకలో హీలియం లీకేజ్ కారణంగా టెక్నికల్ ప్రాబ్లమ్స్ ఎదురయ్యాయి. దీంతో సుమారూ ఏడు నెలలుగా అక్కడే చిక్కుకుపోయిన పరిస్థితి.

మూడోసారి రోదసిలోకి వెళ్లిన సునీతా విలియమ్స్ ఇలా అంతర్జాతీయ అంతరిక్ష కేంద్రంలో నెలలు తరబడి చిక్కుకుపోవడంతో ఆమె ఆరోగ్యంపై రకరకాల కథనాలు తెరపైకి వచ్చాయి. ఆమె తిరిగి భూమి మీదకు ఎప్పుడు వస్తారనేది క్లారిటీ లేదు. ఈ సమయంలో జీరో గ్రావిటీ వద్ద నెలలు తరగబడి తేలుతూ గడపడం వల్ల ఆమె నడక మర్చిపోయారనే విషయం తాజాగా తెరపైకి వచ్చింది! ఈ విషయాలను ఆమె స్వయంగా వెల్లడించారు.

అవును... తాజాగా ఐ.ఎస్.ఎస్.లో తన పరిస్థితిని వివరించిన సునీత విలియమ్స్.. తాను చాలా కాలంగా ఇక్కడే ఉండటం వల్ల నడక ఎలా ఉంటుందో గుర్తుచేసుకోవడానికి ప్రయత్నిస్తున్నట్లు తెలిపారు. ఇంతకాలంగా తను నడవలేదని.. కూర్చోలేదని.. పడుకొని విశ్రాంతి తీసుకోవడానికి కూడా వీలులేకుండా పోయిందని తెలిపారు. ఇన్ని నెలలు ఇక్కడ ఉండటం కొంచెం షాకింగ్ గా అనిపిస్తోందని తెలిపారు.

ఈ పరిణామాల నేపథ్యంలో అంతరిక్షంలో చిక్కుకుపోయిన వ్యోమగాములు సునీత, బుచ్ విల్ మోర్ లను తిరిగి భూమికి తీసుకొచ్చేందుకు సహాయం చేయాలని అమెరికా అధ్యక్షుడు డొనాల్డ్ ట్రంప్ తనను కోరారని స్పేస్ ఎక్స్ అధినేత ఎలాన్ మస్క్ పేర్కొన్నారు. దీంతో... త్వరలో ట్రంప్ చెప్పిన ఆ పని పూర్తిచేస్తామని ఎలాన్ మస్క్ 'ఎక్స్' వేదికగా వెల్లడించారు.

ఈ సందర్భంగా స్పందించిన ఎలాన్ మస్క్... అంతరిక్షంలో చిక్కుకుపోయిన వారిని భూమిపైకి తీసుకొచ్చేందుకు జో బైడెన్ ప్రభుత్వం ఎలాంటి ప్రయత్నమూ చేయలేదని.. వారు చేసిన ఆలస్యం వల్ల వ్యోమగాములు ఎన్నో ఇబ్బందులు ఎదుర్కోవాల్సి వస్తోందని విమర్శించారు. ఏది ఏమైనా.. తాజాగా ట్రంప్ చెప్పిన పని త్వరలో పూర్తి చేస్తామని ఎలాన్ మస్క్ వెల్లడించారు.

వాస్తవానికి... నాసా తాజా ప్రకటన ప్రకారం సునీత విలియమ్స్, బుచ్ విల్ మోర్ లు మార్చి చివర్లో కానీ, ఏప్రిల్ తొలి వారంలో కానీ భూమిని చేరుకునే అవకాశం ఉంది! అయితే... ట్రంప్ కోరిక మేరకు స్పందించిన మస్క్.. వారిని భూమి మీదకు తీసుకొచ్చేందుకు స్పేస్ ఎక్స్ చేపట్టే చర్యలను వేగవంతం చేయనున్నట్లు తెలుస్తోంది.