రెండు కేసులున్న నానమ్మ... మనవళ్లతో మర్డర్ చేయించింది!

ఇంట్లో ఆడపిల్ల తమకు ఇష్టం లేని పెళ్లి చేసుకుందనో, వేరే కులానికి చెందినవారిని వివాహమాడిందనో ఆమెను.. లేదా, వివాహం చేసుకున్న వ్యక్తిని కానీ కడతేర్చే దుస్సహసానికి చాలా మంది వెనుకాడటం లేదు! వీరి కుల దురహంకారానికి పరువు హత్య అని పేరు పెట్టుకుని ఘోరాలకు పాల్పడుతున్నారు. ఈ నేపథ్యంలో.. ఇటీవల సూర్యపేటలో జరిగిన ఓ హత్య వెనుక ఉన్న సంచలన విషయాలు పోలీసులు వెల్లడించారు.

అవును... సూర్యపేటలో ఈ నెల 26న వడ్లకొండ కృష్ణ (30) హత్యకు గురైన సంగతి తెలిసిందే. ఇతడిని ఎవరో చంపి, మృతదేహాన్ని మూసీ కాల్వ గట్టున పడేసిన పరిస్థితి. దీనిపై కేసు నమోదు చేసుకున్న పోలీసులు హత్యకు పాల్పడిన ఆరుగురు నిందితులను అరెస్ట్ చేసి రిమాండ్ కు తరలిస్తున్నట్లు తెలిపారు. ఈ హత్యకు.. అప్పటికే రెండు కేసులున్న నానమ్మ ఈ హత్యకు ప్రేరేపించినట్లు చెబుతున్నారు.

పోలీసులు తెలిపిన వివరాల ప్రకారం... తుంగతుర్తి గ్రామానికి చెందిన వడ్లకొండ డేవిడ్ పాస్టర్ గా పనిచేస్తూ సూర్యపేట బాషానాయక్ తండాలో నివాసం ఉంటున్నారు. అతని కుమారుడు కృష్ణ.. బీ ఫార్మసీ పూర్తి చేసి ఖాళీగా ఉంటున్నారు. ఈ క్రమంలో.. పిల్లలమర్రి గ్రామానికి చెందిన కోట్ల నవీన్ తో పరిచయం ఏర్పడటంతో రెగ్యులర్ గా అతడి ఇంటికి వెళ్తుండేవాడు. ఈ క్రమంలో నవీన్ సోదరితోనూ పరిచయం ఏర్పడింది.

ఈ క్రమంలో.. కృష్ణ – నవీన్ సోదరి భార్గవి ప్రేమించుకున్నారు. అయితే కులాలు వేరు కావడంతో భార్గవి కుటుంబ సభ్యులు పెళ్లి ప్రతిపాదనకు అంగీకరించలేదు. దీంతో.. గత ఏడాది ఆగస్టులో వీరిద్దరూ కుటుంబ సభ్యులకు తెలియకుండా వివాహం చేసుకున్నారు. ఈ సమయంలో భార్గవి కుటుంబ సభ్యులు కేసూ పెట్టడంతో.. పోలీస్ స్టేషన్ కు ఇరు కుటుంబాలను పిలిచి కౌన్సిలింగ్ ఇచ్చి పంపించారు పోలీసులు.

ఈ సమయంలో తన మనవరాలు కులాంతర వివాహం చేసుకుందని భార్గవి నానమ్మ కోట్ల బుచ్చమ్మ రగిలిపోతూ ఉండేదట. మరోపక్క తన సోదరి వివాహం వల్ల పరువు పోయిందని ఇద్దరు సోదరులూ భావించారంట. దీనిపై దూరపు బంధువైన బైరు మహేష్ ను సంప్రదించారు. కారణం... మహేష్ కు కృష్ణతో పాత పరిచయాలు ఉండటమే అని అంటున్నారు. అతడు కృష్ణను నమ్మించి తన ల్యాండ్ వద్దకు తీసుకెళ్లాడట.

ఈ సమయంలో.. స్కూటీ తీసుకొని కృష్ణ ఇంటికి బయలుదేరుతుండగా మహేష్ వెనుక నుంచి మెడ చుట్టూ చేయి వేసి పట్టుకున్నాడు.. అనంతరం అప్పటికే అక్కడ మాటువేసి ఉన్న నవీన్, వంశీ వచ్చి గొంతు నులిమి, పిడిగుద్దులు గుద్ది కృష్ణను హతమార్చారు. అనంతరం మృతదేహాన్ని ప్లాస్టిక్ బస్తాలో మూటగట్టి.. తన నానమ్మ వద్దకు తీసుకెళ్లి చూపించారు. తర్వాత.. ఆ మృతదేహాన్ని మూసీ కాల్వ గట్టున వదిలేశారు.

దీంతో.. రంగంలోకి దిగిన పోలీసులు నిందితులను అరెస్ట్ చేశారు. ఇందులో భాగంగా... కోట్ల నవీన్, కోట్ల సైదులు, కోట్ల వంశీ, కోట్ల బుచ్చమ్మ, బైరు మహేష్, నువ్వుల సాయిచరణ్ ను అరెస్ట్ చేసి రిమాండ్ కు తరలిస్తున్నట్లు తెలిపారు. ఇక్కడ మరో ఆసక్తికర విషయం ఏమిటంటే... ఈ కేసులో నిందితుల్లో భార్గవి నానమ్మ కోట్ల బుచ్చమ్మ తో పాటు అందరికీ నేర చరిత్ర ఉంది.

ఇందులో భాగంగా... భార్గవి సోదరుడు కోట్ల నవీన్ పై నాలుగు కేసులు, మరో సోదరుడు కోట్ల వంశీపై మూడు, భార్గవి తండ్రి కోట్ల సైదులపై ఒకటి, బైరు మహేష్ పై తొమ్మిది, సాయిచరణ్ పై ఒక కేసు ఉండగా.. భార్గవి నానమ్మ కోట్ల బుచ్చమ్మ రెండు కేసుల్లో నిందితులుగా ఉన్నట్లు పోలీసులు తెలిపారు.