దీపక్ హుడాకు అబ్బాయిలపైనే మోజు.. భార్య సంచలన ఆరోపణలు

ప్రపంచ ఛాంపియన్ బాక్సర్ అయిన స్వీటీ బోరా - ఆమె భర్త దీపక్ హుడా మధ్య వివాదం తీవ్రమవుతోంది. ఇద్దరూ ఒకరిపై ఒకరు పోలీస్ స్టేషన్లో ఫిర్యాదులు దాఖలు చేయడంతో ఈ విషయం మరింత పెద్దదైంది. ఇటీవల పోలీస్ స్టేషన్‌లో స్వీటీ బోరా - ఆమె భర్త దీపక్ నివాస్ హుడా మధ్య జరిగిన వాగ్వాదానికి సంబంధించిన వీడియో వైరల్ అయింది. ఈ సంఘటన తర్వాత, స్వీటీ బోరా తన భర్తపై మరింత తీవ్రమైన ఆరోపణలు చేసింది. దీపక్ హుడాకు అబ్బాయిలంటే ఆసక్తి ఉందని ఆమె సంచలన ఆరోపణలు చేసింది. ఈ విషయం తనకు తర్వాత తెలిసిందని పేర్కొంది.

ఇన్‌స్టాగ్రామ్‌లో పోస్ట్ చేసిన వీడియోలో, స్వీటీ బోరా తన అభిప్రాయాలను వ్యక్తం చేస్తూ తన భర్త నుండి విడాకులు కోరింది. "నేను అతని నుండి విడాకులు కోరుతున్నాను. ఒక వ్యక్తి అంత చెడ్డవాడైతే అతనితో ఎందుకు జీవించాలి?" అని ఆమె ప్రశ్నించింది. ఆమె ఆస్తి లేదా డబ్బు కోరడం లేదని, తన డబ్బును తీసుకున్న వ్యక్తిని ఏమీ అడగడం లేదని స్పష్టం చేసింది. తనకు కేవలం విడాకులు కావాలని ఆమె తెలిపింది.

మహిళా పోలీస్ స్టేషన్‌లో తన భర్తను కొట్టిన వీడియోపై స్వీటీ బోరా స్పందిస్తూ... వీడియోలో మొదటి , చివరి భాగాలు లేవని వివరించింది. దీపక్ తనను తీవ్రంగా వేధిస్తున్నాడని, ఉద్దేశపూర్వకంగా తనను చెడుగా చూపించడానికి ప్రయత్నిస్తున్నాడని ఆమె ఆరోపించింది. అంతేకాకుండా దీపక్ హుడా తనను కొట్టేవాడని కూడా ఆమె తెలిపింది. ఈ కేసులో హిసార్ ఎస్పీతో దీపక్ హుడా కలిసి కుట్ర పన్నాడని, వీడియోను తప్పుగా చూపించారని ఆమె ఆరోపించింది.

స్వీటీ బోరా తెలిపిన వివరాల ప్రకారం.., వీడియోలోని సంఘటనకు ముందు , తరువాత జరిగిన సంభాషణలు అందులో లేవు. దీపక్ తన తండ్రి , మామ పేర్లను కూడా ఎఫ్‌ఐఆర్‌లో తప్పుగా రాశాడని ఆమె పేర్కొంది. అంతేకాకుండా, దీపక్ తప్పుడు వైద్య నివేదికను కూడా సృష్టించాడని ఆమె ఆరోపించింది.

స్వీటీ బోరా - దీపక్ నివాస్ హుడా మూడు సంవత్సరాల క్రితం వివాహం చేసుకున్నారు. స్వీటీ తన భర్త కట్నం కోసం వేధిస్తున్నాడని ఆరోపిస్తూ అతనిపై ఎఫ్‌ఐఆర్ దాఖలు చేసింది. వివాహ సమయంలో రూ. 1 కోటి తోపాటు ఒక ఫార్చ్యూనర్ కారు ఇచ్చినప్పటికీ, తక్కువ కట్నం ఇచ్చారంటూ తనను వేధించారని ఆమె ఆరోపించింది.

మరోవైపు దీపక్ కూడా స్వీటీ, ఆమె కుటుంబం తన ఆస్తిని ఆక్రమించుకోవడానికి ప్రయత్నించారని, చంపుతామని బెదిరించారని ఆరోపించాడు. తాను నిద్రిస్తున్నప్పుడు స్వీటీ తన తలపై దాడి చేసిందని, కత్తితో కూడా దాడి చేసిందని దీపక్ చెప్పాడు. ఇరువురి ఫిర్యాదుల మేరకు హిసార్ , రోహ్తక్‌లలో క్రాస్ కేసులు నమోదయ్యాయి.