కొత్త గా పెళ్లయిన జంటలకు కీలక సూచన చేసిన ఉదయనిధి స్టాలిన్

తమిళనాడు లోక్‌సభ నియోజకవర్గాల పునర్విభజన (డీలిమిటేషన్) అంశంపై గత కొంతకాలంగా కేంద్ర ప్రభుత్వంపై తమిళనాడులో అధికారంలో ఉన్న డీఎంకే పార్టీ తీవ్ర విమర్శలు చేస్తోంది. జనాభా ప్రాతిపదికన నియోజకవర్గాలను నిర్ణయిస్తే, రాష్ట్రానికి లోక్‌సభ స్థానాల సంఖ్య తగ్గిపోతుందని అక్కడి నేతలు ఆందోళన వ్యక్తం చేస్తున్నారు.

తాజాగా తమిళనాడు ఉప ముఖ్యమంత్రి ఉదయనిధి స్టాలిన్ ఈ అంశంపై కీలక వ్యాఖ్యలు చేశారు. ముఖ్యమంత్రి ఎంకే స్టాలిన్ పుట్టినరోజు (మార్చి 1) సందర్భంగా నిర్వహించిన వేడుకల్లో భాగంగా 72 జంటలకు సామూహిక వివాహాలు నిర్వహించారు. ఈ సందర్భంగా ఆయన మాట్లాడుతూ కొత్తగా పెళ్లయిన జంటలు పిల్లల్ని కనాలని కోరారు. అయితే అధిక సంఖ్యలో పిల్లల్ని కనొద్దని సూచించారు.

- డీలిమిటేషన్ ప్రభావం

2026 తర్వాత అమల్లోకి వచ్చే డీలిమిటేషన్ ప్రక్రియలో పార్లమెంటరీ నియోజకవర్గాలను జనాభా ఆధారంగా తిరిగి రూపొందించనున్నారు. ఈ విధానం ప్రకారం రాష్ట్రాల్లోని జనాభాకు సరైన ప్రాతినిధ్యం లభించేలా పార్లమెంటులో, అసెంబ్లీల్లో సీట్లు ఉండేలా చూస్తారు. తమిళనాడుతో సహా దక్షిణాది రాష్ట్రాలు జననాల రేటును నియంత్రించగా, దీని ప్రభావంగా పార్లమెంటరీ ప్రాతినిధ్యం తగ్గే అవకాశం ఉందని స్టాలిన్ ఆందోళన వ్యక్తం చేశారు.

ప్రస్తుతం తమిళనాడు నుంచి 39 మంది ఎంపీలు ఉన్నారు. రాష్ట్ర జనాభా 7 కోట్లుగా ఉండటంతో, డీలిమిటేషన్ ప్రక్రియ అమల్లోకి వస్తే ఈ సంఖ్య 31కి తగ్గే అవకాశముంది. అదే సమయంలో, ఎక్కువ జనాభా ఉన్న ఉత్తరాది రాష్ట్రాలు 100కి పైగా సీట్లు పొందే అవకాశముందని ఆయన పేర్కొన్నారు. ఈ కారణంగా, రాష్ట్ర జనాభా అధికంగా ఉండాలని అభిప్రాయపడ్డారు.

- సామాజిక ప్రభావం

తమిళనాడు ముఖ్యమంత్రి ఎంకే స్టాలిన్ కూడా ఇటీవల జరిగిన ఓ కార్యక్రమంలో నవదంపతులు అత్యవసరంగా పిల్లల్ని కనాలని కోరారు. ఈ వ్యాఖ్యలు రాజకీయంగా చర్చనీయాంశంగా మారాయి. ఇది రాష్ట్రానికి ప్రాతినిధ్యం తగ్గకుండా ఉండేందుకు ప్రభుత్వ నేతలు చర్యలు తీసుకుంటున్న సంకేతంగా కొందరు విశ్లేషకులు అభిప్రాయపడుతున్నారు. మరికొందరు దీనిని వివాదాస్పద వ్యాఖ్యలుగా అభివర్ణిస్తున్నారు.

తమిళనాడు ప్రభుత్వం తీసుకునే భవిష్యత్ చర్యలు, కేంద్ర ప్రభుత్వం దీనిపై ఏ విధమైన నిర్ణయం తీసుకుంటుందో చూడాలి.