ఇక వాహనాలు ఎక్కడున్నాయో ఈజీగా తెలుసుకోవచ్చు

ప్రయాణికుల భద్రతను దృష్టిలో ఉంచుకుని, తెలంగాణ ప్రభుత్వం ప్రభుత్వ, ప్రైవేట్ రవాణా వాహనాలకు లొకేషన్ ట్రేసింగ్ డివైజ్‌లను తప్పనిసరిగా అమర్చాలని నిర్ణయించింది. ఈ కొత్త నిబంధనను పబ్లిక్ ట్రాన్స్‌పోర్ట్, గూడ్స్ వెహికల్స్‌పై (కొత్త, పాత) వర్తింపజేయాలని ప్రభుత్వం సంకల్పించింది.

- కేంద్ర అనుమతికి లేఖ

ఈ ప్రణాళికను అమలు చేసేందుకు రాష్ట్ర ప్రభుత్వం ఇప్పటికే కేంద్ర ప్రభుత్వానికి లేఖ రాసింది. కేంద్రం అనుమతి ఇచ్చిన వెంటనే, తెలంగాణ దేశంలో తొలి రాష్ట్రంగా ఈ వ్యవస్థను ప్రవేశపెట్టనుంది. దీనివల్ల ప్రయాణికుల భద్రతకు మరింత భరోసా లభించడంతో పాటు, వాహన చోరీలు, అక్రమ రవాణా వంటి అంశాలను సమర్థవంతంగా చేయవచ్చని అధికారులు చెబుతున్నారు.

- నిబంధనలు పాటించకుంటే కఠిన చర్యలు

ప్రభుత్వం పేర్కొన్న కొత్త రూల్‌ను పాటించని వాహనాలపై కఠిన చర్యలు తీసుకోనున్నట్లు స్పష్టం చేసింది. లొకేషన్ ట్రేసింగ్ డివైజ్ అమర్చని వాహనాలను సీజ్ చేసి, వాటి యజమానులపై కేసులు నమోదు చేస్తామని అధికార వర్గాలు వెల్లడించాయి. ఈ నియమాన్ని మరింత కఠినంగా అమలు చేయడానికి ప్రత్యేకంగా ఒక పర్యవేక్షణ కమిటీని ఏర్పాటు చేయనున్నారు.

-ప్రయాణికుల భద్రతకు కొత్త పరిష్కారం

ఈ కొత్త నియమావళి అమలు వల్ల రవాణా వ్యవస్థ మరింత సమర్థంగా పనిచేసే అవకాశం ఉంది. వాహనాల గమనం ఎప్పటికప్పుడు పర్యవేక్షించడంతో ప్రమాదాలను నివారించడానికి ఇది దోహదపడనుంది. ముఖ్యంగా మహిళలు, విద్యార్థులు, వృద్ధుల కోసం ఈ విధానం ప్రయోజనకరంగా మారనుంది.

తెలంగాణ ప్రభుత్వం తీసుకున్న ఈ ముందడుగు ప్రయాణికుల భద్రతకు కీలకంగా నిలవనుంది. కేంద్రం అనుమతి లభిస్తే, తెలంగాణలోనే కాకుండా దేశవ్యాప్తంగా ఇతర రాష్ట్రాలు కూడా ఈ మోడల్‌ను అనుసరించే అవకాశం ఉంది. రవాణా రంగంలో సమర్థతను పెంచేందుకు, భద్రతను మెరుగుపరచేందుకు ఈ నిర్ణయం ఉపయోగపడనుంది.