జస్ట్ 21 లక్షలకే టెస్లా కారు.. ప్రత్యర్థులకు మస్క్ సవాల్?

ప్రధాని మోడీ అమెరికా వెళ్లారు. అక్కడ ఎలన్ మస్క్ తో ప్రత్యేకంగా భేటి అయ్యారు. అప్పుడే టెస్లా కు ఇండియాకు ద్వారాలు తెరిచారు. ఇప్పటివరకూ ఇండియాలో కార్ మార్కెట్ ను శాసిస్తున్న మారుతి సుజుకీ, టాటా, హుండాయ్, మహేంద్రా లాంటి సంస్థలకు ఇప్పుడు టెస్లా నుంచి కొత్త సవాళ్లు ఎదురుకావడం గ్యారెంటీ అని మార్కెట్ వర్గాలు విశ్లేషించాయి. అన్నట్టే ఎలన్ మస్క్ తన వ్యాపార స్ట్రాటజీని ఇండియాలో వ్యూహాత్మకంగా అమలు చేయడానికి రెడీ అయ్యారు. అత్యంత అధునాతన తన ఎలక్ట్రిక్ కార్లను ప్రజలకు అందుబాటు ధరలో ఇండియాలో లాంచ్ చేయడానికి రంగం సిద్ధంచేస్తున్నట్టు సమాచారం. తద్వారా ఇండియన్ మార్కెట్ ను షేక్ చేయడానికి భారీ ప్రణాళికలు వేస్తున్నట్టు తెలుస్తోంది.

అమెరికా దిగ్గజ ఆటో మొబైల్ సంస్థ టెస్లా 2025 ఏప్రిల్ నాటికి భారత మార్కెట్‌లో తన రిటైల్ కార్యకలాపాలను ప్రారంభించేందుకు సన్నాహాలు చేస్తోంది. ఈ నేపథ్యంలో టెస్లా తన చరిత్రలోనే అత్యంత తక్కువ ధర కలిగిన ఎలక్ట్రిక్ వెహికల్ (EV)ను భారత్‌లో విడుదల చేయనున్నట్లు సమాచారం. దీని ధర 25,000 డాలర్ల లోపుగా (సుమారు రూ. 21 లక్షలు) ఉండే అవకాశం ఉంది.

-భారత మార్కెట్‌లో టెస్లా వ్యూహం

భారత్‌లో తక్కువ పెట్టుబడితో వేగంగా ప్రవేశించేందుకు టెస్లా మొదట్లో స్థానిక ఉత్పత్తి కాకుండా, తన జర్మనీ (బెర్లిన్) ఫ్యాక్టరీ నుండి వాహనాలను దిగుమతి చేసుకునే అవకాశాన్ని పరిశీలిస్తోంది. ఇది భారత మార్కెట్‌లో డిమాండ్‌ను అంచనా వేయడానికి, అలాగే ప్రారంభ పెట్టుబడి భారం తగ్గించుకోవడానికి సహాయపడుతుంది.

- భారత EV మార్కెట్‌లో పెరుగుతున్న పోటీ

ప్రస్తుతం భారతదేశ EV మార్కెట్ వేగంగా వృద్ధి చెందుతోంది. ప్రభుత్వ ప్రోత్సాహంతో పాటు వినియోగదారులలో పర్యావరణ అనుకూలమైన వాహనాలపై ఆసక్తి పెరుగుతోంది. ఈ నేపథ్యంలో టెస్లా ప్రవేశం దేశీయ ఆటోమొబైల్ సంస్థలకు తీవ్రమైన పోటీని తీసుకురావచ్చు. ఇప్పటికే మహీంద్రా, టాటా మోటార్స్ వంటి దిగ్గజ సంస్థలు తమ EV శ్రేణిని విస్తరిస్తున్నాయి.

- భవిష్యత్‌లో భారతదేశంలో టెస్లా ఉత్పత్తి కేంద్రం?

భారతదేశంలో డిమాండ్ పెరిగితే, టెస్లా భవిష్యత్తులో దేశీయంగా మాన్యుఫాక్చరింగ్ ప్లాంట్ ఏర్పాటు చేసే అవకాశముంది. ఇది ఖర్చులను తగ్గించి, భారత వినియోగదారులకు మరింత ప్రయోజనకరమైన ధరలో వాహనాలను అందించే వీలు కల్పిస్తుంది.

ప్రపంచంలోని అత్యంత అధునాతన టెక్నాలజీ కలిగిన బ్రాండ్‌గా గుర్తింపు పొందిన టెస్లా, భారత EV మార్కెట్‌లో ప్రభావాన్ని చూపించే అవకాశం ఉంది. అందుబాటు ధరలో టెస్లా కార్లు భారత వినియోగదారులకు ఎలక్ట్రిక్ వాహనాలపై ఆసక్తిని మరింత పెంచేలా చేయవచ్చు. టెస్లా ప్రవేశంతో భారత EV మార్కెట్‌కు కొత్త దిశలో ఊపిరి వస్తుందని విశ్లేషకులు అంచనా వేస్తున్నారు.