ఆ మాజీ మంత్రి చూపూ కాంగ్రెస్ వైపే? వచ్చే వారమే చేరికా?

తెలంగాణ కాంగ్రెస్ కు ఒక్కోటి కలిసి వస్తున్నాయి.. ఏ క్షణాన పొరుగున ఉన్న కర్ణాటకలో ఘన విజయం సాధించిందో.. ఆ దెబ్బ తెలంగాణ పైనా పడింది. రేవంత్ రెడ్డి సారథ్యం కూడా తోడవడంతో ఎన్నికల ముందు అధికార రేసులో దూసుకెళ్తోంది. వాస్తవానికి ఆరు నెలల కింద కూడా తెలంగాణ కాంగ్రెస్ కు బీఆర్ఎస్ ను ఢీకొట్టే సత్తా ఉందని ఎవరూ అనుకోలేదు. కానీ, ఇప్పుడు బీఆర్ఎస్ కు చెక్ పెట్టేది ఆ పార్టీనే అని నమ్ముతున్నారు.

ఆ మాజీ మంత్రి ఇటే..

తెలంగాణతో పాటు ఉమ్మడి ఏపీలోనూ మంత్రిగా పనిచేసిన నాయకులు కొందరే. అందులోనూ ముగ్గురు సీఎంల వద్ద మంత్రిగా దశాబ్దాల పాటు పనిచేసినవారూ తక్కువే. కానీ, ఖమ్మం జిల్లాకు చెందిన తుమ్మల నాగేశ్వరరావుకు మాత్రం ఆ ప్రత్యేకత దక్కింది. 1985 నుంచి ఆయన ఎక్కువ కాలం మంత్రిగా ఎన్టీఆర్, చంద్రబాబు, కేసీఆర్ తో కలిసి పనిచేశారు.

కాలం అనుకూలించి.. అనుకూలించక..

2009లో సత్తుపల్లి నియోజకవర్గం రిజర్వుడ్ గా మారడంతో తుమ్మల ఖమ్మం వచ్చారు. అక్కడినుంచి గెలిచిన ఆయనకు తెలంగాణ ఏర్పాటుకు ముందు జరిగిన 2014 ఎన్నికల్లో ఓటమి ఎదురైంది. దీని తర్వాత కాలం అనుకూలించడంతో తుమ్మల బీఆర్ఎస్ లో చేరారు. మంత్రి కూడా అయ్యారు. ఎమ్మెల్సీగా ఉంటూ పాలేరు ఉప ఎన్నికలో పోటీ చేసి నెగ్గారు. కానీ, 2018లో వర్గ విభేదాలతో ఓటమి పాలయ్యారు. అయితే, సీఎం కేసీఆర్ కు సన్నిహితుడైనందున మళ్లీ టికెట్ వస్తుందని ఆశించినా.. కాంగ్రెస్ నుంచి వచ్చిన కందాళ ఉపేందర్ రెడ్డికే టికెట్ దక్కింది. దీంతో తుమ్మల రాజకీయంగా కీలక నిర్ణయం తీసుకోనున్నారు.

ప్రస్తుతం స్వగ్రామంలో రాజకీయ చర్చలు సాగిస్తున్న తుమ్మల వచ్చే నెల మొదట్లో కీలక నిర్ణయం తీసుకోనున్నట్లు తెలుస్తోంది. ఆయన కాంగ్రెస్ లో చేరడానికి సిద్ధమయ్యారని సమాచారం. ఇదే జరిగితే ఉమ్మడి ఖమ్మంలో కాంగ్రెస్ కు పెద్ద బలమే. ఇప్పటికే పొంగులేటి శ్రీనివాస రెడ్డి వంటివారు కాంగ్రెస్ కు ఊపు తెచ్చారు. ఆయనకు తుమ్మల కూడా జతయితే తిరుగుండదు. పొంగులేటి పంతమైన ఉమ్మడి ఖమ్మంలో ’’పదికి పది సీట్లలో బీఆర్ఎస్ ను ఓడించడం’’ సులవుగానే నెరవేరుతుంది.