ప్రయాగ్ రాజ్ లో తొలి అపశృతి.. తొక్కిసలాటలో 15 మంది మృతి?

యావత్ ప్రపంచం మాట్లాడుకుంటున్న మహా కుంభమేళలో తొలి అపశృతి నమోదైంది. తొలుత తొక్కిసలాటగా పేర్కొన్నప్పటికి.. తాజాగా వస్తున్న వార్తల ప్రకారం 15 మంది భక్తులు మరణించినట్లుగా చెబుతున్నారు దీని మీద ఇంకా క్లారిటీ లేదు . పలువురికి గాయాలు అయినట్లుగా వెల్లడైంది. ఈ నెల 13న మహా కుంభ మేళా మొదలైంది. ఫిబ్రవరి 26 వరకు ఇది సాగుతుంది. సాధారణంగా ఇలాంటి భారీ కార్యక్రమాల్లో మొదట్లో కానీ.. చివర్లో కానీ తొక్కిసలాట జరిగే ప్రమాదం ఉంటుంది. అందుకు భిన్నంగా కుంభ మేళా మొదలైన దాదాపు రెండు వారాల తర్వాత తొక్కిసలాట చోటుచేసుకోవటం పలువురు ప్రాణాల్ని కోల్పోవటం విషాదంగా మారింది.

గడిచిన పదిహేడు రోజుల్లో 15 కోట్ల మంది పుణ్య స్నానాలు చేసినా జరగని తొక్కిసలాట తాజాగా జరిగింది. దీనికి కారణం.. మౌని అమావాస్యగా పేర్కొంటున్నారు. ఈ వేళలో స్నానాలు ఆచరిస్తే మంచి జరుగుతుందన్న ఉద్దేశంతో భారీగా భక్తులు పోటెత్తారు. లక్షలాదిగా వచ్చిన భక్తుల తాకిడికి బారికేడ్లు విరగటంతో తొక్కిసలాట చోటు చేసుకున్నట్లుగా ప్రాథమిక సమాచారం. సుమారు పదిహేను మంది మరణించినట్లుగా జాతీయ మీడియా సంస్థలు చెబుతున్నాయి. ఈ విషయాన్ని ఒక వైద్యుడు కన్ఫర్మ్ చేసినట్లుగా టీవీ చానళ్లు పేర్కొంటున్నాయి.

మృతుల సంఖ్య పెరుగుతుందన్న అంచనాలు వ్యక్తమవుతున్నాయి. ఈ తొక్కిసలాటలో పెద్ద ఎత్తున భక్తులకు గాయాలు అయినట్లుగా తెలుస్తోంది. దీనికి స్పందించిన యంత్రాంగం వారిని అంబులెన్సుల్లో సమీప ఆసుపత్రులకు తరలించి చికిత్స అందిస్తున్నారు. కుంభమేళాలో తొక్కిసలాటపై ప్రధాన మంత్రి నరేంద్ర మోడీ ఆరా తీశారు. యూపీ ముఖ్యమంత్రి యోగికి ఫోన్ చేసిన ప్రధాని.. తొక్కిసలాటకు సంబంధించిన వివరాల్ని.. దానికి దారి తీసిన కారణాల్ని అడిగి తెలుసుకున్నట్లుగా తెలుస్తోంది.

మంగళవారం అర్థరాత్రి దాటిన తర్వాత ఈ దారుణ పరిస్థితి చోటు చేసుకున్నట్లుగా చెబుతున్నారు. అర్థరాత్రి రెండున్నర గంటల ప్రాంతంలో భారీ ఎత్తున భక్తులు త్రివేణి సంగమం వద్దకు స్నానాలు ఆచరించేందుకురావటం.. ఈ సందర్భంగా చోటు చేసుకున్న తొక్కిసలాటతో అక్కడ ఏర్పాటు చేసిన బారికేడ్లు విరిగిపోయాయి. దీంతో.. తీవ్ర గందరగోళం చోటు చేసుకుంది. ఒకరిపై మరొకరు పడటం.. భయాందోళనలు వ్యక్తం కావటంతో భక్తులు పరుగులు తీశారు. దీంతో పెద్ద ఎత్తున మరణాలు చోటు చేసుకున్నట్లుగా చెబుతున్నారు.