నెట్టింట ట్రంప్ డ్యాన్స్ ఏ రేంజ్ లో వైరల్ అవుతోందంటే..?

ప్రపంచ వ్యాప్తంగా అత్యంత రసవత్తరంగా, మరింత ఆసక్తికరంగా జరిగిన అమెరికా అధ్యక్ష ఎన్నికల్లో రిపబ్లికన్ అభ్యర్థి డొనాల్డ్ ట్రంప్ గెలుపొందిన సంగతి తెలిసిందే. ఈ క్రమంలో... ఎన్నికల సమయంలోనూ, ఫలితాల అనంతరమూ ట్రంప్ ప్రపంచ వ్యాప్తంగా ఎంత చర్చనీయాంశం అవుతున్నారో.. ఆయన డ్యాన్స్ ఇప్పుడు నెట్టింట అదే స్థాయిలో వైరల్ అవుతోంది.

అవును.. వచ్చే ఏడాది జనవరిలో అమెరికా 47వ అధ్యక్షుడిగా ప్రమాణ స్వీకారం చేయబోతున్న డొనాల్డ్ ట్రంప్ ఇప్పుడు ప్రపంచ వ్యాప్తంగా అత్యంత చర్చనీయాంశం అయిన వ్యక్తిగా నిలిచారనే చెప్పాలి. ఈయన తీసుకోబోయే నిర్ణయాలపై ఇప్పుడు ప్రపంచం మొత్తం ఎదురు చూస్తోంది. ఆ సంగతి అలా ఉంటే.. ట్రంప్ డ్యాన్స్ ఇప్పుడు ఆన్ లైన్ లో ట్రెండింగ్ లో ఉంది.

క్రీడాకారులు, సెలబ్రెటీలు, అభిమానులు ఇప్పుడు ఆయన డ్యాన్స్ ను అనుకరిస్తున్నారు. వీటికి సంబంధించిన వీడియోలు నెట్టింట వైరల్ గా మారాయి.. మారుతున్నాయి. ఇప్పుడు ఏ క్రీడ జరుగుతున్నా.. విజేతల సంబరాల్లో ట్రంప్ డ్యాన్స్ ఉంటుందా లేదా అనే చర్చలు కూడా నడుస్తున్నాయన్నా అతిశయోక్తి కాదేమో!

అమెరికాలోని యూనివర్సిటీ స్థాయి ఫుట్ బాల్ మ్యాచుల్లోనే కాదు ప్రొఫెషనల్ మ్యాచ్ లలోనూ ఆటగాళ్లు ఇప్పుడు ట్రంప్ స్టెప్పులు వేస్తున్నారు. ఇటీవల న్యూయార్క్ లోని మాడిసన్ స్క్వే ర్ గార్డెన్ లో జరిగిన యూ.ఎఫ్.సీ.309 మ్యాచ్ ను వీక్షించేందుకు ట్రంప్ హాజరయ్యారు. ఆయనతో పాటు ఎలాన్ మస్క్, తదితరులు హాజరయ్యరు.

ఈ నేపథ్యంలో... ఈ మ్యాచ్ లో విజయం సాధించిన జాన్ జానెస్ కూడా సంబరాల్లో భాగంగా ట్రంప్ డ్యాన్స్ చేస్తూ కనిపించారు. ఇలా దాదాపు ప్రతీ క్రీడా సంబరాల్లోనూ ఇప్పుడు ట్రంప్ మార్కు స్టెప్పులు వేయడం వైరల్ గా మారిపోయింది. ఈ నేపథ్యంలో డొనాల్డ్ ట్రంప్ టీం కూడా ఇలాంటి వీడియోలను సేకరించి తమ ఎక్స్ ఖాతాలో పోస్ట్ చేస్తోంది!