మస్క్ పై ట్రంప్ ప్రశంసలు... 'స్పేస్' పై 'ఎక్స్' అధినేత జోస్యాలు!

గత కొన్ని నెలలుగా ప్రపంచ వ్యాప్తంగా అత్యంత హాట్ టాపిక్ గా మారిన అగ్రరాజ్యం అమెరికా ఎన్నికల ఫలితాల ఉత్కంఠ వీడింది. ఈ ఎన్నికల్లో రిపబ్లికన్ పార్టీ అభ్యర్థి డొనాల్డ్ ట్రంప్ ఆధిపత్యం కనబరిచారు. త్వరలో అమెరికా 47వ అధ్యక్షుడిగా ఆయన ప్రమాణస్వీకారం చేయనున్నారు. ఈ నేపథ్యంలో మస్క్ పై ట్రంప్ ఆసక్తికర వ్యాఖ్యలు చేశారు.

అవును... అమెరికా అధ్యక్ష ఎన్నికల్లో రిపబ్లికన్ పార్టీ అభ్యర్థి డొనాల్డ్ ట్రంప్ తరుపున ప్రపంచ కుబేరుడు ఎలాన్ మస్క్ విస్తృత ప్రచారం చేశారు. ట్రంప్ అధ్యక్షుడయ్యే వరకూ ఆయన పక్కనే ఉంటానని మస్క్ ప్రకటించారు. ఈ సమయంలో ట్రంప్ ప్రచారాలకు భారీగా విరాళాలు ఇచ్చినట్లు కథనాలొచ్చాయి. ఈ సమయంలో ట్రంప్ స్పందించారు.

తన గెలుపు కన్ఫాం అయిన అనంతరం ఫ్లోరిడాలోని వెస్ట్ ఫామ్ బీచ్ లో తన మద్దతుదారులతో నిర్వహించిన సమావేశంలో ట్రంప్ మాట్లాడారు. ఈ సందర్భంగా.. ఇలాంటి విజయం ఎన్నడూ చూడలేదని అన్నారు. అమెరికన్లకు స్వర్ణయుగం రాబోతుందని చెప్పుకొచ్చారు. ఈ సందర్భంగా.. ఈ ఎన్నికల్లో మస్క్ ముఖ్యమైన వ్యక్తి అని కొనియాడారు.

ఇదే క్రమంలో... ఒక స్టార్ ఉంది.. అతను ఓ మేధావి.. మన మేధావులను మనం రక్షించుకోవాలి.. అతను అద్భుతమైన వ్యక్తి.. తన సంస్థ స్పేస్ ఎక్స్ ప్రయత్నాలతో అమెరికా అంతరిక్ష రంగాన్ని ముందుకు తీసుకెళ్లడంలో అతని కృషి అభినందనీయం అని ఎలాన్ మస్క్ గురించి స్పందించారు డొనాల్డ్ ట్రంప్.

ఇదే సమయంలో... నార్త్ కరోలినలోని హెలీన్ హరికేన్ ప్రభావిత ప్రాంతలకు స్టార్ లింక్ కనెక్షన్ లను అందించాలని మస్క్ ను అభ్యర్థించినట్లు ట్రంప్ తెలిపారు. ఆ సమయంలో అతడు చాలా వేగంగా అక్కడికి చేరుకున్నారని.. ఇది తనకు నమ్మశక్యం కాలేదని.. అతను ఆ సమయంలో చాలా మంది ప్రాణాలను కాపాడాడని తెలిపారు!

కాగా... ట్రంప్ విజయం కోసం మస్క్ ప్రచారం చేయడమే కాకుండా భారీ మొత్తంలో ఎలక్షన్ ఫండ్స్ కూడా సమకూర్చినట్లు చెబుతారు. ఇదే సమయంలో స్వింగ్ స్టేట్స్ లో ఓటర్లను ఆకట్టుకోవడానికి ఫ్రైజ్ మనీని కూడా ప్రకటించారు.

మరోపక్క... అమెరికా అధ్యక్ష ఎన్నికల్లొ ట్రంప్ ఘన విజయంతో ఎలాన్ మస్క్ ఫుల్ జోష్ లో ఉన్నట్లు కనిపిస్తున్నారు! ఈ సందర్భంగా నింగిలోని దూసుకెళ్తున్న రాకెట్ ఫోటో షేర్ చేసిన ఆయన... "భవిష్యత్తు అద్భుతంగా ఉంటుంది" అంటూ ఎక్స్ లో పోస్ట్ పెట్టారు.