కెన్నడీ హత్య కేసు రహస్యాలు: బయటపెట్టిన ట్రంప్

అమెరికా చరిత్రలో ఒక చీకటి రోజు నవంబర్ 22, 1963. ఆ రోజున డల్లాస్ నగరంలో అమెరికా 35వ అధ్యక్షుడు జాన్ ఎఫ్. కెన్నడీ దారుణంగా హత్య చేయబడ్డారు. ఈ ఘటన జరిగి ఆరు దశాబ్దాలు దాటినా కెన్నడీ హత్య కేసు ఇప్పటికీ అనేక రహస్యాలతో ముడిపడి ఉన్న ఒక వీడని చిక్కుముడిగానే మిగిలిపోయింది. అధికారికంగా లీ హార్వే ఓస్వాల్డ్ అనే వ్యక్తి ఒంటరిగా ఈ హత్య చేశాడని తేల్చినా, అనేక మంది ఈ వాదనను విశ్వసించరు. ఎన్నో అనుమానాలు, మరెన్నో కుట్ర సిద్ధాంతాలు ఈ కేసు చుట్టూ అల్లుకుని ఉన్నాయి.

అమెరికా మాజీ అధ్యక్షుడు జాన్‌ ఎఫ్‌. కెన్నడీ హత్య వెనుక ఉన్న రహస్యాలను వెలికితీసేందుకు అమెరికా చర్యలు చేపట్టింది. ఈ మేరకు అధ్యక్షుడు డొనాల్డ్‌ ట్రంప్‌ ఆదేశాల మేరకు కెన్నడీ హత్యకు సంబంధించిన రహస్య పత్రాలను తాజాగా బహిర్గతం చేసింది. ఈ డాక్యుమెంట్లను యూఎస్‌ నేషనల్‌ ఆర్కీవ్స్‌ అండ్‌ రికార్డ్స్‌ అడ్మినిస్ట్రేషన్‌ వెబ్‌సైట్‌లో అందుబాటులో ఉంచారు.

ఈ సందర్భంగా యూఎస్‌ నేషనల్‌ ఇంటెలిజెన్స్‌ డైరెక్టర్‌ తులసీ గబ్బార్డ్‌ మాట్లాడుతూ, అధ్యక్షుడు ట్రంప్‌ అత్యంత పారదర్శకతతో కూడిన నూతన శకానికి నాంది పలికారని అన్నారు. ఎలాంటి మార్పులు లేకుండానే కెన్నడీ హత్య కేసు రహస్య పత్రాలను ప్రజలకు అందుబాటులోకి తెచ్చామని ఆమె తెలిపారు. సోమవారం ట్రంప్‌ వెల్లడించినట్లుగా, మాజీ అధ్యక్షుడి మరణానికి సంబంధించిన దాదాపు 80 వేల కీలక పత్రాలను విడుదల చేయనున్నారు. ఇటీవల, ఎఫ్‌బీఐ కెన్నడీ హత్యకు సంబంధించి సుమారు 2400 కొత్త రికార్డులను గుర్తించింది.

- అధికారిక నివేదిక ఏం చెబుతోంది?

కెన్నడీ హత్యపై విచారణ జరిపిన వారెన్ కమిషన్, ఓస్వాల్డ్ ఒక్కడే కిల్లర్ అని తేల్చింది. టెక్సాస్ స్కూల్ బుక్ డిపాజిటరీ భవనం నుండి ఓస్వాల్డ్ మూడు బుల్లెట్లు పేల్చాడని, అందులో రెండు కెన్నడీకి తగిలాయని కమిషన్ పేర్కొంది. ఒకే బుల్లెట్ కెన్నడీతో పాటు అప్పటి గవర్నర్ జాన్ కానల్లీకి కూడా గాయాలు చేసిందని చెప్పే "మ్యాజిక్ బుల్లెట్" సిద్ధాంతం ఈ నివేదికలో ప్రధానమైనది. అయితే, ఈ సిద్ధాంతం అనేక విమర్శలకు గురైంది. ఒకే బుల్లెట్ ఇన్ని గాయాలు చేయడం అసంభవం అని చాలా మంది వాదిస్తారు.

-అనుమానాలు రేకెత్తించే అంశాలు:

వారెన్ కమిషన్ నివేదిక అనుమానాలకు తావిచ్చాయి. కెన్నడీకి ఎన్ని బుల్లెట్లు తగిలాయి, అవి ఏ దిశ నుండి వచ్చాయి అనే విషయంలో స్పష్టత లేదు. కొంతమంది సాక్షులు ఎక్కువ సంఖ్యలో బుల్లెట్లు పేలినట్లు చెప్పారు. అంతేకాకుండా, గ్రాసీ నోల్ అనే ప్రాంతం నుండి కూడా బుల్లెట్ వచ్చి ఉండవచ్చని కొందరు నమ్ముతారు. ఓస్వాల్డ్ ఒక సాధారణ వ్యక్తి. అతనికి అధ్యక్షుడిని హత్య చేసేంత బలమైన కారణం ఏమిటనే ప్రశ్న ఇప్పటికీ వేధిస్తోంది. అతని నేపథ్యం ముఖ్యంగా సోవియట్ యూనియన్‌తో అతనికున్న సంబంధాలు అనేక అనుమానాలకు దారితీశాయి. ఓస్వాల్డ్‌ను పోలీసులు విచారిస్తున్న సమయంలో జాక్ రూబీ అనే వ్యక్తి అతన్ని కాల్చి చంపడం అనుమానాలకు తావిచ్చింది. రూబీకి ఎవరితో సంబంధాలున్నాయి,.. అతను ఎందుకు ఓస్వాల్డ్‌ను చంపాడనే ప్రశ్నలకు ఇప్పటికీ సమాధానం లేదు. అనేక మంది సాక్షులు భిన్నమైన కథనాలు చెప్పారు. కొంతమంది కాల్పులు వేరే దిశ నుండి కూడా వినిపించాయని తెలిపారు. వారి వాంగ్మూలాలను పూర్తిగా పరిగణనలోకి తీసుకోలేదని విమర్శలు ఉన్నాయి.

ప్రధాన కుట్ర సిద్ధాంతాలు:

కెన్నడీ హత్య చుట్టూ అనేక కుట్ర సిద్ధాంతాలు వ్యాప్తి చెందాయి. వాటిలో కొన్ని ముఖ్యమైనవి ఏంటంటే.. కెన్నడీ ప్రభుత్వం మాఫియాపై ఉక్కుపాదం మోపడంతో, మాఫియా ఈ హత్యకు పాల్పడి ఉండవచ్చని కొందరు నమ్ముతారు. కెన్నడీ విధానాలతో విభేదించిన సీఐఏ అధికారులు ఈ హత్యను ప్లాన్ చేసి ఉండవచ్చని కొందరు వాదిస్తారు. ముఖ్యంగా క్యూబా విషయంలో కెన్నడీ తీసుకున్న నిర్ణయాలు సీఐఏకు నచ్చలేదని అంటారు. ప్రచ్ఛన్న యుద్ధం జరుగుతున్న సమయంలో, సోవియట్ గూఢచారి సంస్థ కేజీబీ ఈ హత్య వెనుక ఉండి ఉండవచ్చని కొందరు అనుమానిస్తారు. అప్పటి ఉపాధ్యక్షుడు లిండన్ బి. జాన్సన్ కెన్నడీ మరణం తర్వాత అధ్యక్షుడయ్యాడు. ఈ కారణంగా కొందరు అతని ప్రమేయం కూడా ఉండి ఉండవచ్చని అనుమానిస్తారు.

- డీక్లాసిఫైడ్ పత్రాలు.. కొనసాగుతున్న చర్చ:

కెన్నడీ హత్యకు సంబంధించిన అనేక పత్రాలను అమెరికా ప్రభుత్వం ఇప్పటికీ రహస్యంగా ఉంచింది. కొన్ని పత్రాలను డీక్లాసిఫై చేసినప్పటికీ, అవి మరింత స్పష్టతను ఇవ్వడానికి బదులుగా మరింత గందరగోళాన్ని సృష్టించాయి. ఈ కేసుపై చర్చ ఇప్పటికీ కొనసాగుతూనే ఉంది. కొత్త సాక్ష్యాలు వెలుగులోకి వస్తున్నా, పూర్తి నిజం ఎప్పటికీ బయటపడకపోవచ్చని కొందరు భావిస్తున్నారు. ట్రంప్ వీటిని బయటపెట్టడంతో హత్యపై చిక్కుముడి వీడింది.

జాన్ ఎఫ్. కెన్నడీ హత్య ఒక విషాదకరమైన సంఘటన మాత్రమే కాదు, ఇది అమెరికా చరిత్రలో ఒక శాశ్వతమైన మచ్చ. అధికారికంగా ఒక వ్యక్తి ఒంటరిగా ఈ హత్య చేశాడని తేల్చినా, అనేక అనుమానాలు, ప్రశ్నలు ఇప్పటికీ సమాధానం కోసం ఎదురుచూస్తున్నాయి. ఈ కేసులోని రహస్యాలు ట్రంప్ పత్రాలతోనైనా కొన్ని నిజాలు వెలుగులోకి వచ్చాయి..