ఏరువాక సాగుతున్న విజయసాయిరెడ్డి... వైరల్ పిక్స్!

వైసీపీ కీలక నేత, మాజీ ఎంపీ, వైఎస్ కుటుంబంలో మూడు తరాలకు నాలుగు దశాబ్ధాలుగా విశ్వాసపాత్రుడిగా పేరున్న విజయసాయిరెడ్డి.. ఇటీవల రాజకీయాలనుంచి తప్పుకుంటున్నట్లు ప్రకటించిన సంగతి తెలిసిందే. ఈ విషయం ఒక్కసారిగా తీవ్ర సంచలనంగా మారింది. సాయిరెడ్డి తీసుకున్న ఈ నిర్ణయంపై ఆసక్తికర చర్చలు తెరపైకి వచ్చాయి.

ఇందులో కొంతమంది వైరాగ్యం అని, మరికొంతమంది దోచుకున్నదంతా దోచుకుని ఇప్పుడు ఈ మాటలేలా అని, ఇంకొంతమంది ఇందులో జగన్ పెద్ద ప్లానే ఉండి ఉంటుందని రకరకాల విశ్లేషణలు, భావానువాదాలు తెరపైకి వచ్చాయి. అయితే... అవేమీ లేవని.. ఇందులో ఎవరి ఒత్తిడీ లేదని.. జగన్ కు వివరించిన తర్వాతే ఈ నిర్ణయం అని ప్రకటించారు.

ఇదే సమయంలో.. రాజకీయాలకు దూరంగా ఉండాలని నిర్ణయించుకున్న తన భవిష్యత్తు దృష్టంతా వ్యవసాయంవైపే ఉంటుందని విజయసాయిరెడ్డి వెల్లడించారు. ఈ క్రమంలో అన్నట్లుగానే ఏరువాగ సాగు మొదలుపెట్టినట్లు విజయసాయిరెడ్డి ఎక్స్ వేదికగా ప్రకటించారు. దీనికి సంబంధించిన పిక్స్ ఇప్పుడు నెట్టింట సందడి మొదలుపెట్టాయి.

అవును... ఇకపై తన దృష్టంతా వ్యవసాయంపైనే అని ప్రకటించిన విజయసాయిరెడ్డి... తన వ్యవసాయ క్షేత్రంలో ఉన్న కొన్ని ఫోటోలను సోషల్ మీడియాలో పోస్ట్ చేశారు. ఇందులో టీషర్ట్, ట్రాక్ ప్యాంట్, షూ ధరించి.. టాప్ లెస్ జీపులో మోడర్న్ రైతు లుక్ లో దర్శనమిచ్చారు.

ఈ ఫోటోలను ఎక్స్ లో పోస్ట్ చేస్తూ... ‘నా ఉద్యాన పంటల కార్యకలాపాలను తాజాగా ప్రారంభించానని చెప్పడానికి ఎంతో సంతోషిస్తున్నాను’ అంటూ రాసుకొచ్చారు. అయితే.. ఈ ఉద్యానవనం ఎక్కడ అనేది మాత్రం వెల్లడించలేదు. అయితే.. జీపు నెంబర్ ప్లేట్ కర్ణాటక రాష్ట్రాన్ని సూచిస్తుంది!