వైజాగ్ హనీ ట్రాప్ కేసులో బిగ్ ట్విస్ట్!... నిందితుడే బాధితుడు!?

ఇటీవల కాలంలో హనీ ట్రాప్ వ్యవహారాలు తెరపైకి వచ్చి హల్ చల్ చేస్తున్న సంగతి తెలిసిందే. ఈ వ్యవహారాల్లో తొలుత నిందితులు అనుకున్నవారు తర్వాత బాధితులుగా మారిన సందర్భాలు కూడా చాలానే ఉంటుంటాయి. ఈ క్రమంలో తాజాగా వైజాగ్ లో వెలుగులోకి వచ్చిన జాయ్ జేమిమ అనే మహిళ హనీ ట్రాప్ కేసులో సరికొత్త కోణాలు వెలుగు చూస్తున్నాయి.

అవును... ఇటీవల వైజాగ్ లో ఓ హనీట్రాప్ వ్యవహారం వెలుగుచూసిన సంగతి తెలిసిందే. స్థానిక మురళీనగర్ ఎన్జీవోస్ కాలనీకి చెందిన ఓ యువతి ఇన్ స్టా ద్వారా షీలానగర్ కు చెందిన ఓ ఎన్నారై యువకుడితో పరిచయం పెంచుకుంది. అతనితో పాటు ఆ ఫ్యామిలీ కొంతకాలంగా అమెరికాలోనే ఉంటోంది. ఈ సమయంలో జాయ్ జెమీమా అనే యువతి అతడితో పరిచయం పెంచుకుంది.

ఈ క్రమంలో.. అతడి తల్లితండ్రులు షీలానగర్ లో ఉన్న సమయంలో అడ్రస్ తెలుసుకుని ఇంటికి వెళ్లింది. వారితో మంచిగా నటించి.. మీ అబ్బాయి స్నేహితురాలిని, పెళ్లి చేసుకోవాలనుకుంటున్నాను అని చెప్పింది. అయితే అందుకు ఆ యువకుడి పేరెంట్స్ నిరాకరించారు. అనంతరం వారు తిరిగి అమెరికా వెళ్లిపోయారు.

ఈ నేపథ్యంలో అమెరికాలో తల్లితండ్రుల వద్ద ఉంటున్న ఆ యువకుడికి మాయ మాటలు చెప్పి విశాఖకు రప్పించింది జెమీమా! ఈ సమయంలో విశాఖ విమానాశ్రయం నుంచే నేరుగా తన ఇంటికి తీసుకెళ్లిన ఆమె.. మత్తు పదార్ధాలు కలిపిన జ్యూస్ తాగించి, అతడితో సన్నిహితంగా ఉంటున్నట్లుగా ఫోటోలు తీసుకుని, బ్లాక్ మెయిల్ చేయడం మొదలుపెట్టిందట.

ఈ క్రమంలో ఇటీవల భీమిలోని ఓ హోటల్లో బలవంతంగా నిశ్చితార్ధం కూడా జరిపించేసిందంట. అనంతరం... ఈ ఫోటోలు అన్నీ చూపించి, కేసు పెట్టి, అమెరికాకు తిరిగి వెళ్లకుండా చేస్తానని బెదిరించడం మొదలుపెట్టిందంట. ఇదే సమయంలో అతని వద్ద ఉన్న డబ్బులు కాజేసిందని చెబుతున్నాడు సదరు యువకుడు.

ఈ పరిస్థితుల నడుమ ఎట్టకేలకు ఈ నెల 4న ఆ యువకుడు ఆమె నుంచి తప్పించుకుని భీమిలి పోలీసులను ఆశ్రయించాడు. దీంతో.. పోలీసులు జెమీమాను అదుపులోకి తీసుకున్నారు.

కట్ చేస్తే... తాజాగా మరో కొత్త విషయం తెరపైకి వచ్చింది.. ఇది పోలీసులకే జెమిమ మార్కు జలక్ ఇచ్చిన విషయంగా చెబుతున్నారు. ఈమె ఈ ఏడాది జనవరిలో వ్యాపారవేత్త ఎడ్ల ఐజాక్ ను హనీ ట్రాప్ చేసి, తిరిగి రేప్ కేసు పెట్టిందట. దీంతో పీఎం పాలెం పోలీసులు ఐజాక్ పై ఎఫ్.ఐ.ఆర్ నమోదు చేశారు. అప్పటికి ఈమె వ్యవహారాలను గుర్తించలేకపోయినట్లున్నారు!

తీరా ఇప్పుడు ఆ విషయాలన్నీ తిరగతోడితే... నాడు ఐజక్ కూడా ఈమె హనీ ట్రాప్ బాదితుడే అని తేలిందని అంటున్నారు. దీంతో... అప్పటి నిందితుడే ఇప్పుడు బాధితుడిగా మారాడని చెబుతున్నారు. మరి ఎన్నో ట్విస్టులు, మరెన్నో జలక్కులతో సాగుతున్న ఈ హనీ ట్రాప్ వ్యవహారం ఏ విధంగా కొలిక్కి వస్తాదనేది వేచి చూడాలి!