వైరల్ వీడియో : వారెవా? చేస్తే ఇలా దమ్ముగా పంపిణీ చేయాలి!

చేసే పని ఏదైనా దమ్ముగా.. ధైర్యంగా చేసే నేతలు కొందరు ఉంటారు. తాము చేసేది తప్పుడు పనైనా సరే.. ఓపెన్ గా చేసేస్తారు. ఇప్పుడు అలాంటి తీరునే ప్రదర్శించారు వైసీపీ నేత దొడ్డి బాపు ఆనంద్. సోషల్ మీడియా లో వైరల్ అవ్వుతున్న వీడియో ప్రకారం దసరా పండుగ సందర్భంగా ఆయన పందారం ఇప్పుడు హాట్ న్యూస్ గా మారింది. పండుగ వేళ అందరికి పండుగ చేయాలన్న సదుద్దేశంతో ఆయన వ్యవహరించిన తీరును పలువురు తిట్టి పోస్తున్నా.. కొందరు మాత్రం అభినందిస్తున్నారు. చేసేది ఇంత ఓపెన్ గా చేయటం మాటలు కాదని.. అందుకు ఆయన్ను అభినందించి తీరాల్సిందేనని వ్యాఖ్యానిస్తున్నారు.

విశాఖ దక్షిణ మండల వైసీపీ అధ్యక్షుడిగా వ్యవహరిస్తున్న ఆయన దసరా పండుగను పురస్కరించుకొని పలువురికి ఒక కోడి.. క్వార్టర్ మందును బహిరంగ పంపిణీ చేశారు అని తెలుస్తుంది కానీ అది నిన్న జరిగిందా లేక పాత వీడియో వేరే సందర్భంలో జరిగింది ఇప్పుడు వైరల్ చేస్తున్నారా అనేది తెలియాల్సి ఉంది . విశాఖలోని డాబా గార్డెన్స్ లోని వైసీపీ కార్యాలయం వద్ద ఈ పంపిణీ కార్యక్రమాన్ని చేపట్టారు అని అంటున్నారు. ఫోటోలను సైతం తీయించుకున్నారు. గతంలో కేజీ మటన్ ఇచ్చామని.. ఈసారి అందుకు భిన్నంగా ఏకంగా ఒక కోడినే ఇస్తున్నట్లుగా ఆయన వ్యాఖ్యానించారు అని అంటున్నారు .

తమ అధినేత దశల వారీగా మద్యపాన నిషేధానికి ప్రతిన పూనితే.. అందుకు భిన్నంగా నేతలు మాత్రం ఇలా క్వార్టర్ మందును పండుగ వేళ పంపిణీ చేయటాన్ని పలువురు విమర్శిస్తున్నారు. కోడిని.. క్వార్టర్ మందును పంపిణీ చేయటాన్ని ఘనకార్యక్రమంగా అభివర్ణిస్తున్న వారి తీరుపై విస్మయం వ్యక్తమవుతోంది. తమ చేతల కారణంగా పార్టీని మాటలు పడేలా చేస్తున్నామన్న భావన వైసీపీ నేతలకు కలిగితే బాగుండన్న మాట పలువురి నోట వినిపిస్తోంది.