మహిళా ఎమ్మెల్యేకు, ఆమె భర్తకు కాంగ్రెస్‌ సీట్లు ఇచ్చేనా?

తెలంగాణలో వచ్చే అసెంబ్లీ ఎన్నికల్లో పోటీ చేసే అభ్యర్థుల జాబితాను బీఆర్‌ఎస్‌ అధినేత కేసీఆర్‌ ప్రకటించిన సంగతి తెలిసిందే. ఈ క్రమంలో ఏడు స్థానాల్లో సిట్టింగ్‌ ఎమ్మెల్యేలకు సీట్లు నిరాకరించారు. వీటిలో ఒక్క వేములవాడ మినహాయించి మిగిలివన్నీ ఎస్సీ, ఎస్టీ రిజర్వుడ్‌ నియోజకవర్గాలే కావడం గమనార్హం.

ముఖ్యంగా 2014, 2018 ఎన్నికల్లో వరుసగా రెండుసార్లు టీఆర్‌ఎస్‌ తరఫున నిర్మల్‌ జిల్లా ఖానాపూర్‌ లో గెలుపొందిన అజ్మీరా రేఖానాయక్‌ కు ఈసారి కేసీఆర్‌ సీటు నిరాకరించడం హాట్‌ టాపిక్‌ గా మారింది. ఆమెను తప్పించి భూక్యా జాన్సన్‌ రాథోడ్‌ నాయక్‌ కు కేసీఆర్‌ సీటు కేటాయించారు.

దీంతో ఆ నియోజకవర్గంలో రాజకీయ పరిణామాలు వేగంగా మారిపోతున్నాయి. సీట్లు రానివారిపై కాంగ్రెస్‌ పార్టీ దృష్టి సారించింది. వారితో మంతనాలు జరుపుతోంది. మరోవైపు సీట్లు లభించని నేతలు కూడా కాంగ్రెస్‌ పార్టీ వైపు దృష్టి సారిస్తున్నారు.

ఈ క్రమంలో తనకు సీటు దక్కకపోవడంతో ఖానాపూర్‌ ఎమ్మెల్యే రేఖా నాయక్‌ తిరుగుబాటు బావుటా ఎగురవేశారు. కాంగ్రెస్‌ లో చేరడానికి ఆమె సిద్ధమవుతున్నారు. ఇప్పటికే ఆమె భర్త శ్యాం నాయక్‌ పీసీసీ అధ్యక్షుడు రేవంత్‌ రెడ్డి సమక్షంలో కాంగ్రెస్‌ లో చేరారు.

ఈ క్రమంలో ఎమ్మెల్యే రేఖా నాయక్‌ కూడా కాంగ్రెస్‌ పార్టీ ఇన్‌చార్జి మాణిక్‌ రావు ఠాక్రేతో ఆగస్టు 22 సాయంత్రం సమావేశం కానున్నారు. ఆమె మంగళవారమే ఆయన సమక్షంలో కాంగ్రెస్‌ లో చేరతారని తెలుస్తోంది.

ఈ సందర్భంగా మీడియాతో మాట్లాడిన రేఖా నాయక్‌ వచ్చే అసెంబ్లీ ఎన్నికల్లో తాను ఖానాపూర్‌ నుంచే పోటీ చేస్తానని స్పష్టం చేశారు. బీఆర్‌ఎస్‌ క్యాడర్‌ కూడా తనతోనే ఉంటుందని ధీమా వ్యక్తం చేశారు. ఖానాపూర్‌ లో తన సత్తా ఏంటో చూపిస్తానని సవాల్‌ విసిరారు.

కాగా రేఖానాయక్‌ భర్త మాజీ రవాణా శాఖ అధికారి శ్యాం నాయక్‌ అసిఫాబాద్‌ స్థానం నుంచి కాంగ్రెస్‌ పార్టీ తరఫున బరిలోకి దిగడానికి ఏర్పాటు చేసుకుంటున్నారు. ఈ నేపథ్యంలోనే రేఖా నాయక్‌ ను కూడా కాంగ్రెస్‌లో చేర్చుకొని ఖానాపూర్‌ సీటు ఇవ్వాలని కాంగ్రెస్‌ పార్టీ భావిస్తోందని అంటున్నారు.

కాగా అసిఫాబాద్‌ బీఆర్‌ఎస్‌ ఎమ్మెల్యేగా ఉన్న ఆత్రం సక్కుకు కూడా కేసీఆర్‌ సీటు నిరాకరించారు. ఆత్రం గత ఎన్నికల్లో కాంగ్రెస్‌ తరఫున గెలుపొంది ఆ తర్వాత బీఆర్‌ఎస్‌ లో చేరారు. ఆత్రం సక్కుకు వచ్చే ఎన్నికల్లో ఆదిలాబాద్‌ ఎంపీ స్థానం కేటాయిస్తారని.. అందుకే ఆయనకు ఇప్పుడు అసెంబ్లీ టికెట్‌ కేటాయించలేదని చెబుతున్నారు. అయితే ఆయన కూడా అసెంబ్లీకే పోటీ చేయడానికి మొగ్గుచూపుతున్నారని టాక్‌ నడుస్తోంది.