విమానంలో వీడియో... సీట్లో స్లీప్ వద్దు – లగేజ్ కంపార్ట్మెంట్లోనే ముద్దు!

విమాన ప్రయాణాల్లో జరిగే కొన్ని ఆసక్తికర విషయాలు వైరల్ గా మారుతుంటున్న సంగతి తెలిసిందే. వాటిలో కొన్ని అసభ్యకరంగా, అసహ్యంగా ఉండగా.. మరికొన్ని ఫన్నీగా ఉంటుంటాయి! ఈ క్రమంలో మరో ఆసక్తికరమైన విషయం తాజాగా తెరపైకి వచ్చింది. ఇందులో భాగంగా... విమానంలోని లగేజీ కంపార్ట్మెంట్ లో నిద్రించింది ఓ మహిళ!

అవును... ఓ పక్క నిద్ర ముంచుకొస్తుండటం.. మరోపక్క సీటులో స్లీప్ అంటే అసౌకర్యంగా ఫీలయ్యిందో ఏమో కానీ... అమెరికాలో ఓ విమాన ప్రయాణికురాలు కాస్త వెరైటీగా ఆలోచించింది. సీట్లో కూర్చొని అసౌకర్యంగా కునుకు తీసేకన్నా.. పైన ఉండే లగేజీ కంపార్ట్మెంట్ లోకి దూరి హాయిగా పడుకోవచ్చని భావించింది! అంతే... అనుకున్నదే తడవుగా తన ప్లాన్ ను అమలు చేసేసింది.

వెంటనే లగేజ్ కంపార్ట్మెంట్ లో దూరి కునుకు తీసేసింది! దీనికి సంబంధించిన వీడియో నెట్టింట చక్కర్లు కొడుతుంది. సౌత్ వెస్ట్ ఎయిర్ లైన్స్ కు చెందిన విమానంలో ఈ ఘటన చోటుచేసుకున్నట్లు "న్యూయార్క్ పోస్ట్" వెల్లడించింది. విమానంలోని మరో ప్రయాణికుడు ఈ వీడియో తీశాడు! అనంతరం టిక్ టాక్ లో పోస్ట్ చేయడంతో... మిలియన్ల వ్యూస్ వచ్చాయట!

ఇక ఈ వీడియోను చూసిన నెటిజన్లు తమ తమ క్రియేటివిటీకి పనిచెబుతూ కామెంట్లు పెడుతున్నారు. “ప్రయాణికులకు నచ్చిన సీటునే కాదు.. నచ్చిన ప్లేస్ ని కూడా ఎంపిక చేసుకొనే అవకాశం సౌత్ వెస్ట్ ఎయిర్ లైన్స్ లో ఉన్నట్లుంది” అంటూ ఒకరు కామెంట్ చేయగా.. “ఎంత రొటీన్ కి భిన్నంగా ఆలోచిస్తే మాత్రం మరీ ఇలాగా” అని మరొకరు కామెంట్ పెట్టారు!