ఓడిపోయిన ఈ వైసీపీ ఎమ్మెల్యేల రూటే స‌ప‌రేటు!

ఏపీ రాజ‌కీయాల్లో ఇప్పుడు హాట్ టాపిక్ ఏంటంటే... వైసీపీ నేత‌ల సోష‌ల్ మీడియా పోస్టింగ్‌లు, వాటి కారణంగా ప్ర‌స్తుత కూట‌మి ప్ర‌భుత్వం తీసుకుంటున్న నిర్ణ‌యాలు. స‌హ‌జంగానే ఈ చ‌ర్య‌లు క‌ల‌క‌లంగా మారాయి. ముఖ్యంగా వైసీపీ ఓడిన నేత‌ల్లో వ‌ణుకు పుట్టిస్తున్నాయి. ఇదిలాఉండ‌గా, ఓడిపోయిన వైసీపీ నేతలు ముఖ్యంగా ప‌లువురు ఎమ్మెల్యేలు త‌మ ప్రైవేట్ లైఫ్ గ‌డుపుతున్న ఫొటోలు, వీడియోలు సోషల్ మీడియా దృష్టిని ఆక‌ర్షిస్తున్నాయి.

రాజ‌కీయాల్లో గెలుపు ఓట‌ములు స‌హ‌జం. గెలిచిన‌పుడు ఆనందంతో, ఆహ్లాదంతో ఉండ‌టం ఎంత ముఖ్య‌మో... ఓడిన‌ప్పుడు కూడా అంతే సంయ‌మ‌నంతో వ్య‌వ‌హ‌రించాలి. త‌దుప‌రి ద‌శ‌కు సిద్ధ‌మ‌వ్వాలి. ఇలా వైసీపీకి చెందిన‌ మాజీ ఎమ్మెల్యేలు హైదరాబాద్ లోని ఓ హోటల్ లో కలుసుకున్న వీడియోలు సోషల్ మీడియాలో వైరల్ అవుతున్నాయి. మాజీ ఎమ్మెల్యేలు మేకపాటి విక్రమ్ రెడ్డి, శిల్పా రవి, హఫీజ్ ఖాన్ తదితరులు గ‌డిపిన రిలాక్సింగ్ ఫోటో ఒక‌టి సోష‌ల్ మీడియాలో హ‌ల్ చ‌ల్ అవుతోంది.

వైసీపీ మాజీ యువ ఎమ్మెల్యేలు హైద‌రాబాద్‌లో జ‌రుపుకొన్న ప్రైవేట్ మీటింగ్ ఫోటోలు నెట్టింట ఆస‌క్తిక‌రంగా మార‌గా మ‌రికొంద‌రు వారి పొలిటిక‌ల్ జ‌ర్నీ గురించి ప్ర‌స్తావిస్తున్నారు. ఉమ్మడి కర్నూలు జిల్లాలోని నంద్యాల అసెంబ్లీ సెగ్మెంట్ నుంచి బ‌రిలో దిగిన శిల్పా రవి చంద్ర కిశోర్ రెడ్డి స్టైలిష్ స్టార్ అల్లు అర్జున్ తో ప్ర‌చారం చేయించిన‌ప్ప‌టికీ టీటీపీ అభ్యర్థి ఫరూక్ చేతిలో ఓటమి పాలయ్యారు. 2018లో ఆయ‌న ఎమ్మెల్యేగా గెలుపొందారు. ఇక మేక‌పాటి గౌత‌మ్ రెడ్డి ఉప ఎన్నికల్లో పోటీ చేసి విజయం సాధించారు. వైసీపీ ప్ర‌భుత్వంలో పరిశ్రమల శాఖ మంత్రిగా ఉన్న‌ గౌతమ్ రెడ్డి గుండెపోటుతో మరణించడంతో.. ఆత్మ‌కూరులో ఉప ఎన్నిక జ‌రిగిన సంగ‌తి తెలిసిందే. మ‌రో ఎమ్మెల్యే అయిన‌ హఫీజ్ ఖాన్ వైసీపీ అభ్యర్థిగా 2018 ఎన్నికల్లో కర్నూలు బరిలోకి దిగి విజయం సాధించారు. పార్టీలో వర్గ విభేదాల నేపథ్యంలో ఈ ఎన్నికల్లో ఆయనకు పోటీ చేసే అవ‌కాశం ద‌క్క‌లేదు.

ఈ నలుగురు యువ ఎమ్మెల్యేలు అసెంబ్లీలోకి అడుగుపెట్టిన స‌మ‌యంలో ఏర్ప‌డిన స్నేహం బంధం ఇప్ప‌టికీ కొన‌సాగుతోంద‌ని, మాజీలు అయినప్ప‌టికీ లేదా పోటీ చేసే అవ‌కాశం ద‌క్క‌న‌ప్ప‌టికీ వారి మ‌ధ్యఉన్న దోస్తీ కార‌ణంగా మ‌రియు ప్ర‌స్తుతం జ‌రుగుతున్న ప‌రిణామాల గురించి చ‌ర్చించుకునేందుకు హైదరాబాద్ లోని ఓ హోటల్ లో క‌లుసుకున్న‌ట్లు వైసీపీ వ‌ర్గాలు పేర్కొంటున్నాయి.