రేవంత్ కి మంచి సూచన చేసిన వైసీపీ మంత్రి...

తెలంగాణా కొత్త ముఖ్యమంత్రి రేవంత్ రెడ్డికి ఏపీ సీనియర్ మంత్రి వైసీపీకి చెందిన ముఖ్య నేత బొత్స సత్యనారాయణ మంచి సూచన చేశారు. గురువారం ఎల్బీ స్టేడియంలో అశేష జన సందోహం మధ్యన రేవంత్ రెడ్డి తెలంగాణా రాష్ట్ర రెండవ ముఖ్యమంత్రిగా ప్రమాణ స్వీకారం చేశారు.

ఆయనకు ఏపీ నుంచే కాకుండా ప్రధాని నరేంద్ర మోడీ నుంచి కూడా అభినందనలు అందుతున్నాయి. ముఖ్యమంత్రి వైఎస్ జగన్ సైతం రేవంత్ రెడ్డికి ట్వీట్ చేశారు. రెండు తెలుగు రాష్ట్రాలు సహకరించుకోవాలని జగన్ ఆకాక్షించారు.

ఇక సీనియర్ మంత్రి బొత్స సత్యనారాయణ అయితే తెలుగు రాష్ట్రాల మధ్య పరస్పర సహకారం అవసరం అని రేవంత్ రెడ్డికి సూచించారు. ఆయన సీఎం గా ప్రమాణం చేయడం పట్ల ఆనందం వ్యక్తం చేశారు. ప్రజల ఆకాంక్షలను నెరవేర్చాలని కొత్త ముఖ్యమంత్రిని కోరారు.

ఏపీ తెలంగాణాల మధ్య చక్కని సంబంధాలు ఉండాలని బొత్స కోరుకున్నారు. రేవంత్ రెడ్డితో పాటు ఇతర మంత్రులకు కూడా ఆయన అభినందనలు తెలియచేశారు. ఇదిలా ఉంటే రేవంత్ రెడ్డికి వైసీపీ నుంచి ప్రభుత్వ పరంగా వ్యక్తిగతంగా కూడా అభినందనలు పెద్ద ఎత్తున అందాయి.

తెలంగాణాలో కాంగ్రెస్ ప్రభుత్వం ఏర్పాటుతో ఏపీలో రెండు పార్టీల మధ్య ప్రభుత్వాల మధ్య రిలేషన్స్ ఎలా ఉంటాయి అన్న చర్చకు తెర లేస్తోంది. అయితే తెలంగాణా ఏపీ సహకరించుకోవాలని వైసీపీ మంచి సూచనలు చేస్తోంది. విభజన నాటి సమస్యలు ఎన్నో పెండింగులో ఉన్నాయి.

నదీ జలాల వివాదంతో పాటు ఆస్తుల పంపనాలు ఇతర అంశాలు అన్నీ కూడా ఉన్నాయి. అయితే కేసీయార్ టైం లో చాలా వరకూ పరిష్కారం కాలేదు. మరి కాంగ్రెస్ జాతీయ పార్టీ కాబట్టి బ్రాడ్ గా ఆలోచిస్తుంది అని అంతా అనుకుంటున్నారు. ఏపీలో కూడా కాంగ్రెస్ కాలూనుకోవాలని చూస్తోంది కాబట్టి ఏపీకి అన్ని విధాలుగా న్యాయం చేసేలా కాంగ్రెస్ ప్రభుత్వం పనిచేస్తుందని అంతా భావిస్తున్నారు. మొత్తానికి ఏపీ తెలంగాణాల మధ్య రిలేషన్స్ మంచిగా ఉండాలని సగటు ప్రజలు అటూ ఇటూ కూడా కోరుకుంటున్నారు.