వైసీపీలో మరో అసంతృప్త స్వరం.. కేతిరెడ్డి ఎందుకిలా?

సోషల్ మీడియాలో యాక్టివ్ గా ఉండే పొలిటీషియన్ కేతిరెడ్డి వెంకట రామిరెడ్డి. తన అభిప్రాయాలను నిక్కచ్చిగా నిర్మొహమాటంగా చెప్పడం ఆయన స్టైల్. అధికారంలో ఉండగా, గుడ్ మార్నింగ్ ధర్మవరంతో హైలెట్ గా నిలిచిన ఆయన ఎన్నికల్లో అనూహ్యంగా ఓడిపోయారు. తాను ఎంత కష్టపడినా, ప్రభుత్వ విధానాల వల్లే పరాజయం ఎదురైందని భావిస్తున్న కేతిరెడ్డి తరచూ తన అభిప్రాయాలను వెల్లడిస్తున్నారు. ఇటీవల కాలంలో పార్టీ విధానాలను విమర్శిస్తూ ఆయన ప్రకటనలివ్వడం చర్చనీయాంశమవుతోంది. మాజీ ఎంపీ విజయసాయిరెడ్డి రాజీనామా తర్వాత కేతిరెడ్డి పార్టీపై కేతిరెడ్డి సెటైర్లు వేయడం అనేక అనుమానాలకు తావిస్తోంది.

పార్టీ విధానాల వల్ల రాజకీయంగా ప్రతికూల పరిస్థితులు ఎదురవుతున్నాయని భావిస్తున్న మాజీ ఎమ్మెల్యే కేతిరెడ్డి మరోమారు సంచలన వ్యాఖ్యలు చేశారు. ఎన్నికల ఫలితాలు వచ్చిన తర్వాత ఇసుక, మద్యం విధానాల వల్లే ఓడిపోయామని వ్యాఖ్యానించిన కేతిరెడ్డి.. ఇప్పటికీ తమ పార్టీ మారలేదని తాజాగా వ్యాఖ్యానించారు. టీడీపీ కార్యాలయంపై దాడితోపాటు అప్పటి ప్రతిపక్ష నేత, ప్రస్తుత ముఖ్యమంత్రి చంద్రబాబు అరెస్టు, చంద్రబాబు భార్య భువనేశ్వరి వ్యక్తిత్వంపై మాటల దాడిని గుర్తుచేసిన కేతిరెడ్డి వైసీపీ ఓటమికి ఇవే కారణాలుగా చెబుతున్నారు.

ఎన్నికలు ముగిసి ఏడు నెలలు అవుతున్నా, గత ప్రభుత్వంలో జరిగిన తప్పులను కేతిరెడ్డి పదేపదే ఎత్తిచూపడం చర్చనీయాంశమవుతోంది. ఇటీవల పార్టీ నేత విజయసాయిరెడ్డి రాజీనామా సమయంలోనూ స్పందించిన కేతిరెడ్డి.. కేసుల నుంచి తప్పించుకోడానికి సాయిరెడ్డి ఏమీ అతీతుడు కాదని చెప్పారు. సమయం చిక్కినప్పుడల్లా సొంతపార్టీపై విమర్శలు చేస్తున్న కేతిరెడ్డి.. ప్రభుత్వానికి సమయం ఇవ్వాలని గతంలో సూచించారు. అదేవిధంగా డిప్యూటీ సీఎం పవన్ పనితీరుపైనా ప్రశంసలు కురిపించారు.

ఏదిఏమైనా తాజాగా కేతిరెడ్డి వ్యాఖ్యలు వైరల్ అవుతున్నాయి. వైసీపీ విధానాల వల్ల తనలా కష్టపడిన ఎమ్మెల్యేలు కూడా ఓడిపోవాల్సివచ్చిందని కేతిరెడ్డి ఆవేదనగా కనిపిస్తోంది. ఇసుక, మద్యం కుంభకోణాలపై ప్రభుత్వం విచారణ చేపట్టింది. ఇప్పటికే సీఐడీ, ఏసీబీ కేసులు నమోదు చేసింది. మైనింగ్ కుంభకోణంలో అప్పటి డైరెక్టర్ వెంకటరెడ్డి అరెస్టు అయ్యారు. ఇక మద్యం కుంభకోణంపై త్వరలో అరెస్టులు జరిగే అవకాశం ఉంది. ఈ నేపథ్యంలో తప్పు తమదేనన్నట్లు కేతిరెడ్డి మరోసారి కామెంట్లు చేయడం వెనుక మర్మమేంటి? అంటూ అంతా ఆరా తీస్తున్నారు.