'దళపతి - స్టైలిష్ స్టార్' కలిసి చిందేస్తే చూడాలి: స్టార్ క్రికెటర్

సౌత్ ఇండియన్ సినీ ఇండస్ట్రీలో స్టార్ హీరోలుగా వెలుగుతున్నారు ఇళయదళపతి విజయ్, స్టైలిష్ స్టార్ అల్లు అర్జున్. వీరిద్దరూ ఎవరి ఇండస్ట్రీలలో వారు స్టార్స్. అయితే ఈ ఇద్దరికీ కామన్ పాయింట్ ఏంటంటే.. విజయ్, అల్లు అర్జున్ ఇద్దరూ కూడా డాన్స్ లో మేటిలు. కొన్ని సినిమాలు వీరి యాక్టింగ్, స్టోరీలతో హిట్ అయితే.. కొన్ని సినిమాలు మాత్రం వీరి డాన్స్ తోనే హిట్ అవుతుంటాయి. అలా సినిమాలు పోయినా వీరి డాన్స్ మాత్రం హిట్ అవుతూనే ఉంది. తాజాగా దళపతి విజయ్, అల్లు అర్జున్ కలిసి ఒకే తెరమీద డాన్స్ వేస్తే ఎలా ఉంటుంది అనే ఆలోచన సోషల్ మీడియాలో తెగ వైరల్ అవుతుంది. ఆ ఐడియా ఎవరిదో కాదు.. మన ఇండియన్ స్టార్ క్రికెటర్ రవిచంద్రన్ అశ్విన్ ఈ విధంగా తన మనసులోని మాట బయటపెట్టాడు.

ఇటీవల అశ్విన్ తన ఇంస్టాగ్రామ్ స్టోరీలో.. ఇలా రాసుకొచ్చాడు. 'దళపతి విజయ్, అల్లు అర్జున్ కలిసి ఒకేసారి ఒకే తెరమీద డాన్స్ చేస్తే ఆ పెర్ఫార్మన్స్ ఓ రేంజిలో ఉంటుంది. వారి డాన్స్ కి కొలమానం కూడా వేయలేము' అంటూ పోస్ట్ చేసాడు. అయితే అది జరుగుతుందో లేదో తెలియదు కానీ అశ్విన్ ఆలోచన మాత్రం అద్భుతంగా ఉందంటూ కామెంట్స్ చేస్తున్నారు నెటిజన్లు. ఫ్యూచర్ లో విజయ్, అర్జున్ కలిసి నటిస్తారని ఖచ్చితంగా చెప్పలేం. కానీ ఏదైనా అవార్డుల ఫంక్షన్స్ లో మాత్రం ఈ ఐడియా వర్కౌట్ అయ్యే అవకాశం ఉంది. చూడాలి మరి వీరిద్దరిని ఎవరైనా కాలు కదిపేలా చేస్తారేమో. ఇదిలా ఉండగా.. ప్రస్తుతం విజయ్ మాస్టర్ సినిమా విజయాన్ని ఆస్వాదిస్తున్నాడు. మరోవైపు అల్లు అర్జున్ పుష్ప షూటింగ్ లో బిజీగా ఉన్నాడు. పాన్ ఇండియా మూవీగా పుష్ప ఈ ఏడాది ఆగష్టు 13న విడుదల కాబోతుంది.