కృష్ణార్జున యుద్దం మొదలైంది!!

నేచురల్ స్టార్ నాని.. అదేదో న్యాచురల్ గా చెట్లకు కాయలు కాసినట్లు.. ఏడాది పొడుగునా అరటి పళ్ళ గెలలు ఇరగేసినట్లు.. మనోడు సంవత్సరమంతా సినిమాలు చేస్తూనే ఉంటాడు. అదిగో ఒక సినిమా రిలీజయ్యేనాటికే మరో సినిమా షూటింగ్ సగంలో ఉంటుంది. ఇక ఆ సినిమా షూటింగ్ పూర్తవుతుంది అనుకుంటే వెంటనే మరో సినిమాను సెట్ చేసి సెట్ మీదకు ఎక్కిస్తాడు.

ప్రస్తుతం నాని 'ఎంసిఎ' ఎలియాస్ మిడిల్ క్లాస్ అబ్బాయి సినిమా షూటింగులో బిజీగా ఉన్నాడు. ఈ సినిమా షూటింగ్ దాదాపు పూర్తికావొస్తుంది అనగా మనోడు మరో సినిమాను పట్టాలెక్కించాడు. వెంకటాద్రి ఎక్సప్రెస్.. ఎక్సప్రెస్ రాజా సినిమాలను తీసిన మేర్లపాక గాంధి డైరక్షన్లో ఇప్పుడు నాని ''కృష్ణార్జున యుద్దం'' అనే సినిమాను చేస్తున్నాడు. తన కెరియర్లో రెండోసారి ఈ సినిమా కోసం ద్విపాత్రాభినయం చేస్తున్నాడులే. ఒక బైక్ మీద కృష్ణుడి ఫ్లూట్ పెట్టుకుని వెళ్తున్న ఫోటోను ఒకటి షేర్ చేస్తూ.. ఈ సినిమా షూటింగ్ మొదలైందని చెప్పకనే చెప్పాడు నాని.

ఇకపోతే ఎంసిఎ సినిమాను అప్పట్లో ఓ మై ఫ్రెండ్ సినిమా తీసిన వేణు శ్రీరాం తీస్తున్నాడు. దిల్ రాజు ప్రొడక్షన్లో చేస్తున్న ఈ సినిమా కూడా ఒక ఎమోషనల్ సెంటిమెంటల్ డ్రామానే. అంటే ఆల్రెడీ మొన్ననే నేను లోకల్ సినిమాతో బాక్సాఫీస్ ను దంచేసిన దిల్ రాజు అండ్ నాని కాంబినేషన్ ఇప్పుడు మరోసారి అదే రిపీట్ చేస్తుందనమాట. అది సంగతి.