వైరల్ పిక్: స్టైలిష్ ప్రభాస్ తో ప్రభాస్ శ్రీను..!

యంగ్ రెబల్ స్టార్ ప్రభాస్ వరుసగా పాన్ ఇండియా సినిమాలు చేస్తూ పాన్ ఇండియా స్టార్ గా మారిపోయాడు. ఇప్పటికే 'రాధే శ్యామ్' షూటింగ్ ని ఫైనల్ స్టేజికి తీసుకొచ్చిన ప్రభాస్.. 'సలార్' మరియు 'ఆదిపురుష్' సినిమాల చిత్రీకరణలో పాల్గొంటున్నారు. 'సాహో' తర్వాత వెండితెరపై కనిపించడానికి కాస్త సమయం తీసుకున్న డార్లింగ్.. ఇలా వరుసగా సినిమాలు చేస్తుండటంతో ఫ్యాన్స్ ఖుషీ అవుతున్నారు. ఈ క్రమంలో సినిమాలకు సంబంధించిన ఏ అప్డేట్ వచ్చినా వైరల్ చేసేస్తున్నారు. అయితే తాజాగా ప్రభాస్ లేటెస్ట్ పిక్ ఒకటి సోషల్ మీడియాలో చక్కర్లు కొడుతోంది.

ప్రభాస్ శ్రీను తీసిన ఈ సెల్ఫీ ఫొటోలో డార్లింగ్ ప్రభాస్ కళ్ళద్దాలు పెట్టుకొని స్టైలిష్ గా నవ్వుతూ కనిపిస్తున్నాడు. ఫొటో బ్యాగ్రౌండ్ చూస్తుంటే ఇది 'సలార్' లొకేషన్స్ లో తీసుకున్నదిలా అనిపిస్తోంది. ప్రస్తుతం ఈ ఫోటో నెట్టింట వైరల్ అవుతోంది. తెలుగులో సినిమాల్లో హస్య నటుడిగా పేరు తెచ్చుకున్న ప్రభాస్ శ్రీను.. ప్రభాస్ తో 'రాఘవేంద్ర' సినిమా నుంచి అసోసియేట్ అవుతూ వస్తున్నారు. ప్రభాస్ తో ఉన్న సాన్నిహిత్యంతో అతని స్క్రీన్ నేమ్ ప్రభాస్ శ్రీనుగా మారిపోయిందనే విషయం తెలిసిందే.

కాగా, 'కేజీఎఫ్' దర్శకుడు ప్రశాంత్ నీల్ తెరకెక్కిస్తున్న ''సలార్'' మూవీ వచ్చే ఏడాది ఏప్రిల్ లో ప్రేక్షకుల ముందుకు రానుంది. ఈ చిత్రంలో ప్రభాస్ సరసన శృతి హాసన్ హీరోయిన్ గా నటిస్తోంది. ఇక ఇతిహాసం రామాయణం ఆధారంగా రూపొందుతున్న 'ఆది పురుష్' సినిమా 2022 ఆగస్ట్ లో విడుదల కానుంది. రేపు శ్రీరామనవమి సందర్భంగా ఈ సినిమాకు సంబంధించిన అప్డేట్ వస్తుందని ఫ్యాన్స్ ఆశగా ఎదురుచూస్తున్నారు.