విజిటింగ్ వీసాపై అమెరికా వచ్చిన 75 ఏళ్ల తెలుగు వ్యక్తి అగ్నిప్రమాదంలో మృతి
అమెరికాలోని చికాగో సబర్బన్‌లో మంగళవారం మధ్యాహ్నం ఘోర అగ్ని ప్రమాదం చోటుచేసుకుంది.
By: Tupaki Desk | 19 Feb 2025 8:30 AM GMT
అమెరికాలోని చికాగో సబర్బన్‌లో మంగళవారం మధ్యాహ్నం ఘోర అగ్ని ప్రమాదం చోటుచేసుకుంది. ఈ ప్రమాదంలో ఓ ఇల్లు పూర్తిగా దగ్ధమవగా, రెండో అంతస్తులో ఉన్న 75 ఏళ్ల వ్యక్తి బయటకు రాలేక ప్రాణాలు కోల్పోయారు. మరో వ్యక్తి తీవ్రంగా గాయపడి ఆసుపత్రిలో చికిత్స పొందుతున్నారు. భారత్ నుంచి విజిటింగ్ వీసాపై తన కుమార్తె కుటుంబంతో ఆనందంగా గడపడానికి వచ్చిన పెద్దాయన ఈ ప్రమాదంలో ప్రాణాలు కోల్పోవడం స్థానిక తెలుగు కమ్యూనిటీలో విషాదాన్ని నింపింది. నాలుగు నుంచి అయిదు నెలల పాటు కుటుంబంతో సమయం గడపాలని భావించిన ఆయన, అకస్మాత్తుగా జరిగిన ఈ ఘటనతో కన్నుమూశారు.
- ప్రమాదానికి గల కారణాలు
ప్రాథమిక సమాచారం ప్రకారం, ఇంట్లో వెలిగించిన ప్రమిద లేదా కొవ్వొత్తి కారణంగా ఈ ప్రమాదం జరిగిందని అనుమానిస్తున్నారు. అయితే అగ్ని ప్రమాదానికి ఖచ్చితమైన కారణం ఏమిటనే దానిపై ఇంకా పోలీసులు అధికారిక ప్రకటన చేయలేదు. ఫైర్ డిపార్ట్‌మెంట్ దర్యాప్తు కొనసాగుతోంది.
- స్థానికుల స్పందన
ఈ సంఘటన స్థానిక తెలుగు కమ్యూనిటీకి తీవ్రమైన దుఃఖాన్ని మిగిల్చింది. కుటుంబ సభ్యులు తీవ్ర విషాదంలో మునిగిపోయారు. బాధితుడి కుటుంబానికి సాయంగా తెలుగు సంఘాలు ముందుకు రావాలని కమ్యూనిటీ సభ్యులు ఆకాంక్షిస్తున్నారు.
ఇలాంటి ప్రమాదాలను నివారించేందుకు, ఇంట్లో అగ్ని సంబంధిత వస్తువులను జాగ్రత్తగా ఉపయోగించాలని ఎన్నారైలు కోరుతున్నారు.. ముఖ్యంగా, ప్రమిదలు, కొవ్వొత్తులు, గ్యాస్ వంటగదిలో ఉండే పరికరాలను ఉపయోగించిన తర్వాత నిర్లక్ష్యం చేయకుండా చూసుకోవాలి. అలాగే, ఫైర్ అలారమ్‌లు, స్మోక్ డిటెక్టర్లు ఉండేలా చూసుకోవడం అత్యంత ముఖ్యమని సూచిస్తున్నారు.
ఈ విషాదకర సంఘటన తర్వాత స్థానిక కమ్యూనిటీ భద్రతా చర్యలపై మరింత శ్రద్ధ పెట్టేలా ప్రణాళికలు రచిస్తున్నట్లు సమాచారం. బాధితుడి కుటుంబానికి ప్రగాఢ సంతాపాన్ని తెలియజేస్తూ, ఇలాంటి ఘటనలు మళ్లీ జరుగకుండా జాగ్రత్తలు తీసుకోవాలని నిపుణులు సూచిస్తున్నారు.
