డ్రీమ్ గ‌ర్ల్ 2: క‌ర్టెన్ వెన‌క నీడ‌ను చూసి షాక్ తిన్నారా?

తెర ముందు అబ్బాయి.. తెర‌వెన‌క అమ్మాయి అయితే.. ఇలాంటి క‌థ‌లో ర‌క్తి క‌ట్టించే ఎలిమెంట్స్ కి కొద‌వేమీ ఉండ‌దు. అమ్మాయిని అనుక‌రిస్తూ అబ్బాయిల‌ను బురిడీ కొట్టించే ఆక‌తాయి కుర్రాడి క‌థ‌తో తెరకెక్కిన డ్రీమ్ గ‌ర్ల్ బాలీవుడ్ లో ఘ‌న‌విజ‌యం సాధించింది. ఆయుష్మాన్ ఖురానా ఈ చిత్రంలో క‌థానాయ‌కుడిగా న‌టించాడు. హిందీ చిత్రం `డ్రీమ్ గర్ల్` ప్రేక్షకులపై శాశ్వత ముద్ర వేసింది. ఇప్పుడు అభిమానులు `డ్రీమ్ గర్ల్ 2` కోసం ఎంతో ఆస‌క్తిగా వేచి చూస్తున్నారు.

నిజానికి డ్రీమ్ గ‌ర్ల్ సీక్వెల్ ని ప్ర‌కటించి చాలా కాల‌మే అయింది. ఈ సీక్వెల్ చిత్రీక‌ర‌ణ వేగంగా పూర్త‌వుతోంది. ఇందులో పూజా పాత్రలో ఆయుష్మాన్ ఖురానా ఫస్ట్ లుక్ తాజాగా విడుద‌లైంది. ఇది అభిమానుల్లో ఆసక్తిని రేకెత్తించింది. కర్టెన్ తొల‌గించి చూస్తున్న అబ్బాయితో ఓకే కానీ క‌ర్టెన్ల వెన‌క ఉన్న నీడ(అమ్మాయి)ను చూసాక ఎవ‌రైనా షాక్ తినాల్సిందే. ఆ నీడ‌లో ఉన్న ర‌హ‌స్యం క్యూరియాసిటీని పెంచుతోంది. అమ్మాయి పేరుతో ర‌సిక రాజాల‌ను ఆడుకునే కుర్రాడి క‌థేమిట‌న్న‌ది తెర‌పై చూడాల్సిందే.

సీక్వెల్ ఫస్ట్ లుక్ ఎంతో ఆస‌క్తిని పెంచింది. గడ్డం మీసాలు ఉన్న‌ కుర్రాడు చీర‌క‌ట్టుతో ఎలాంటి గ్యాంబ్లింగ్ చేయ‌బోతున్నాడో `డ్రీమ్ గర్ల్ 2` చూసి తెల‌సుకోవాల్సిందే. ఆగష్టు 25న ఈ సినిమా థియేటర్లలోకి రానుంది. మొదటి భాగాన్ని పెద్ద హిట్ చేయ‌డానికి కార‌ణం .. ఇందులో అద్భుత‌మైన బావోద్వేగాలు ఉత్కంఠ క‌లిగించే డ్రామా చ‌క్క‌ని న‌ట‌ప్రదర్శనలు.. వీట‌న్నిటినీ తిరిగి సీక్వెల్లోను పండించ‌గ‌లిగితే ఆయుష్మాన్ అండ్ టీమ్ కి మ‌రో బ్లాక్ బ‌స్ట‌ర్ ద‌క్కిన‌ట్టేన‌ని అంచ‌నా వేస్తున్నారు. అభిమానులు ఎంతో ఆసక్తిగా ఎదురుచూస్తున్న ఈ సీక్వెల్ కి సంబంధించిన మరిన్ని టీజర్ లు మునుముందు రానున్నాయి. ట్రైల‌ర్ ప్ర‌మోష‌న‌ల్ మెటీరియ‌ల్ తో మ‌రింత ఉత్కంఠ పెంచుతారేమో చూడాలి. రాజ్ శాండ్యాల‌ ఈ చిత్రానికి ద‌ర్శ‌క‌త్వం వ‌హించారు.