కరోనాతో యువకుడి ఆట.. చివరకు బుక్కయ్యాడు

ప్రపంచాన్ని వణికిస్తున్న కరోనా వైరస్ అంటే ఇప్పుడు అందరూ వణికిపోతున్నారు. చైనీయులను ఇతర దేశాల్లోకి రానీయడం లేదు. వారి వస్తువులను తీసుకోవడం లేదు. వందలాది మంది ప్రాణాలు తీస్తున్న ఈ వైరస్ పై ప్రపంచమంతా ఆందోళన వ్యక్తమవుతోంది.

అయితే ఈ కరోనా వైరస్ పై సోషల్ మీడియాలో ఫన్నీ వీడియోలు, స్ఫూఫ్ లు , మీమ్స్ కూడా తయారు చేసుకుంటూ కొందరు పండుగ చేసుకుంటున్నారు. ఆ కోవలోనే జనాన్ని భయ పెట్టేందుకు అమెరికా లో ఓ యువకుడు రెడీ అయ్యారు. పైశాచిక చర్యకు దిగి అడ్డంగా బుక్కయ్యాడు.

అమెరికాకు చెందిన టైరల్ వ్యాలెస్ అనే యువకుడు ఇల్లినాయిస్ లోని వాల్ మార్ట్ మాల్ లోకి వెళ్లాడు. ముక్కుకు మాస్క్.. టీషర్ట్ వెనుక ‘నాకు కరోనా వైరస్ ఉంది’ అని రాసుకున్న కాగితాన్ని అంటించి మాల్ లో తిరిగాడు. ఇది చూసి జనం బెంబేలెత్తి పరుగులు తీశారు. మాల్ సిబ్బంది పోలీసులకు ఫిర్యాదు చేయడంతో వారు వచ్చి యువకుడిని అరెస్ట్ చేసి జైలుకు పంపారు.

ఇలా సరదా కోసం కరోనా వైరస్ ను వాడి జనాన్ని బెదిరిద్దామని చేసి దందుడుకు పని ఓ యువకుడిని జైలు పాలు చేసింది. ప్రాణాలు తీసే కరోనాతో ఆట ఆడిన వాడికి చివరకు శ్రీకృష్ణ జన్మ స్థానం దక్కింది.