సీఎం కేసీఆర్ అప్రమత్తంగా ఉండాల్సిన సమయమా? పంచాంగ శ్రవణం చెప్పిందేంటి?

మిగిలిన పండుగలకు ఉగాదికి ఒక తేడా ఉంది. తెలుగు వారి కొత్త సంవత్సరం వేళ.. మిగిలిన పండగుల మాదిరి అన్నీ ఉంటాయి. వాటితో పాటు.. పంచాంగ శ్రవణం ప్రత్యేకంగా ఉంటుంది. చివరకు ప్రభుత్వాలు సైతం ఈ పంచాంగ శ్రవణాన్ని ప్రత్యేకంగా నిర్వహిస్తుంటాయి. ఈ ఏడాది తెలంగాణ రాష్ట్ర ప్రభుత్వం ఆధ్వరంలో నిర్వహించిన శ్రీ శోభకృత నామ సంవత్సర పంచాంగాన్ని పలువురు మంత్రులు, అధికార పార్టీ ఎమ్మెల్యేలు కలిసి అవిష్కరించారు.
ఈ సందర్భంగా పంచాంగ శ్రవణ కార్యక్రమాన్ని నిర్వహించారు. అయితే.. ఈ ప్రోగ్రాంకు ముఖ్యమంత్రి కేసీఆర్ కానీ.. ఆయన కుమారుడు కేటీఆర్ కానీ హాజరు కాకపోవటం గమనార్హం. రవీంద్ర భారతిలో నిర్వహించిన ఈ కార్యక్రమానికి శారదా పీఠం పండితులు బ్రహ్మర్షి బాచంపల్లి సంతోష్ కుమార్ పంచాంగ శ్రవణాన్ని పఠించారు.ఈ సందర్భంగా పలు ఆసక్తికర విషయాల్ని వెల్లడించారు.

పాలకులు అప్రమత్తంగా ఉండాల్సిన అవసరాన్ని ఒకటికి నాలుగుసార్లు ప్రస్తావించటం గమనార్హం. ఈ పంచాంగ శ్రవణం విన్నంతనే.. రాబోయే రోజుల్లో పాలన అంత సజావుగా సాగదన్న భావన కలుగక మానదు. అదే సమయంలో.. అనూహ్య ఘటనలు చోటు చేసుకుంటాయన్న విషయాన్ని ప్రస్తావించినట్లుగా కనిపిస్తుంది. పండితులు బాచంపల్లి చేసిన పంచాంగ శ్రవణంలోని కీలక అంశాల్ని చూస్తే..

- ఈ ఏడాది రాష్ట్ర ప్రభుత్వం సుపరిపాలన అందిస్తుంది. పెండింగ్ బిల్లుల్ని క్లియర్ చేస్తుంది. కొంత మంది వ్యక్తుల నుంచి వ్యతిరేకతలు వస్తాయి. పాలించే రాజు జాగ్రత్తగా ఉండాలి. కేంద్ర, రాష్ట్ర ప్రభుత్వాల్లో సమూల మార్పులు జరిగే అవకాశాలు ఉన్నాయి.

- నాగార్జున సాగర్, శ్రీశైలం, కాళేశ్వరం ప్రాజెక్టులన్నీ ఈ ఏడాది నిండబోతున్నాయి.

- ఈ ఏడాది విద్యార్థులకు మంచి అవకాశాలు రాబోతున్నాయి. విద్యాశాఖలో కొన్ని అవకతవకలు జరిగే ప్రమాదం ఉంది.

- న్యాయ వ్యవస్థ ఈ ఏడాది మంచి తీర్పులు ఇవ్వబోతోంది. సుప్రీంకోర్టు, హైకోర్టు ప్రభుత్వానికి అనుకూలంగా తీర్పులు ఇవ్వబోతున్నాయి.

- ఈ ఏడాది ప్రతిపక్షాలు తమ ఉనికిని కాపాడుకోవాలి. కొన్ని మత ఘర్షణలు, సామాజిక ఉద్రిక్తతలు జరిగే అవకాశం ఉంది. ఉత్తర భారతంలో అగ్నిప్రమాదం జరిగే అవకాశం ఉంది.

- అక్టోబర్, నవంబర్, డిసెంబర్ తెలంగాణ రాజకీయాల్లో ఆసక్తికరమైన సంఘటనలు జరగబోతున్నాయి. ఈ మూడు మాసాల్లో విపరీతమైన ఒడిదుడుకులు జరగబోతున్నాయి. తెలంగాణ ప్రజలు ఆసక్తికరమైన రాజకీయాలను చూడబోతున్నారు.

- మత ఘర్షణలు జరిగే ప్రమాదం ఉంది. పోలీసులు బాగా పనిచేసే అవకాశం ఉంది.

- ధరలు తగ్గబోతున్నాయి. ఏప్రిల్‌లో విపరీతమైన ఎండలు ఉంటాయి.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.