ఈ టీనేజర్ పేరు వింటే తాలిబన్లకే టెన్షన్

ఆ అమ్మాయి ఒక టీనేజర్. తన తోటి వారికి భిన్నం. కొద్ది కాలం క్రితం వరకూ మిగిలిన వారి మాదిరే ఉండేది. ఎప్పుడైతే తన తల్లిదండ్రుల్ని తన కళ్ల ఎదుటే దారుణంగా తాలిబన్ ముష్కరులు హత్య చేశారో.. అప్పటి నుంచి ఆమెలో దాగున్న అపరకాళి బయటకు వచ్చింది. తాలిబన్లకు ప్రాణభయం అంటే ఏమిటో చూపిస్తున్న ఈ టీనేజర్ ఆఫ్ఘనిస్తాన్ లో ఇప్పుడో సంచలనం. పద్నాలుగేళ్ల ఈ అమ్మాయి ఇప్పుడు హాట్ టాపిక్ గా మారింది. ఇంతకూ ఏం జరిగిందంటే?

ఘోర్ రాష్ట్రంలోని ఒక గ్రామానికి చెందిన గ్రామపెద్దను తాలిబన్లు దారుణంగా చంపేశారు. ఆయన భార్యను హతమార్చారు. ఎందుకంటే.. ప్రభుత్వానికి అనుకూలంగా ఉన్నారంటూ హత్య చేశారు. ఇంట్లో ఉన్న వారిని బయటకు తీసుకొచ్చి మరీ ఇద్దరిని కాల్చేశారు. ఈ దారుణాన్ని కళ్లారా చూసిందీ బాలిక. భయంతో వణికిపోయింది. అంతలోనే తన తల్లిదండ్రుల్ని హత్య చేసిన వారిపై ప్రతీకారం తీర్చుకునేందుకు ఇంట్లో ఉన్న ఏకే 47 తుపాకీతో ఇద్దరు తాలిబన్లను చంపేసింది.

తన తల్లిదండ్రుల హత్యకు కారణమైన మరికొందరిని కూడా గాయపర్చింది. ఈ ఘటన అనంతరం.. తాలిబన్లు పలువురు ఆ బాలికను మట్టుబెట్టేందుకు ఆ ఊరి వైపు వచ్చారు. అప్పటికే స్పందించిన ఆఫ్ఘన్ ప్రభుత్వం వారిని మట్టుబెట్టారు. ఆమెకు.. ఆమె సోదరుడికి ప్రాణహాని ఉండటంతో సురక్షిత ప్రాంతానికి తరలించారు. ఈ అమ్మాయి ధైర్యసాహసాలు ఇప్పుడు వైరల్ గా మారాయి. ఇప్పుడామెను అందరూ అభినందనలతో ముంచెత్తుతున్నారు. మరోవైపు.. టీనేజర్ ధైర్యసాహసాలు తాలిబన్లకు ఇప్పుడు షాకింగ్ గా మారాయి.